ބޯންމެރޯ ޓްރާންސްޕްލާންޓް ހެދުމަށް މާލީގޮތުން ތަނަވަސްކަން ނެތް ތެލެސީމިއާ 28 ކުއްޖަކު، ޒަކާތު ފަންޑުގެ އެހީގައި މި ފަރުވާ ހޯދުމަށް ރާއްޖޭން ބޭރަށް ފޮނުވާފައިވާ ކަމަށް ސިއްޙަތާބެހޭ ވަޒީރު ގީލާ އަލީ ވިދާޅުވެއްޖެއެވެ.

ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން ވަޒީރު ގީލާ އަލީ ވިދާޅުވީ، ބޯންމެރޯ ޓްރާންސްޕްލާންޓް ހެދުމަށް ކޮންމެ އަހަރަކު 10 ކުއްޖަކު ރާއްޖެއިން ބޭރަށް ފޮނުވުމަށް ހަމަޖެހިފައިވާއިރު ކޮންމެ ކުއްޖަކަށް އެއް މިލިއަން ރުފިޔާ ހަރަދުކުރުމަށް ހަމަޖެހިފައިވާ ކަމަށެވެ.

"ބޯންމެރޯ ޓްރާންސްޕްލާންޓުގެ ޚިދުމަތުގެ ދަށުން 28 ތެލެސީމިއާ ކުދިން ބޯންމެރޯ ޓްރާންސްޕްލާންޓް ކުރުމަށް މިހާރު ވަނީ ފޮނުވިފަ." ގީލާ ވިދާޅުވިއެވެ.

ޒަކާތު ހައުސްއިން މީގެ ކުރިން ބުނެފައިވަނީ، ޝަރުތު ހަމަވާ ތެލެސީމިއާ ކުދިންގެ ބޯންމެރޯ ޓްރާންސްޕްލާންޓްގެ ޚަރަދަށް ބޭނުންވާ ފައިސާ ނޭޝަނަލް ސޯޝަލް ޕްރޮޓެކްޝަން އެޖެންސީ (އެން.އެސް.ޕީ.އޭ) އަށް ޒަކާތު ހައުސްއިން ޖަމާކޮށްދޭ ކަމަށެވެ. މި އެހީ ފޯރުކޮށްދެނީ 21 ފެބްރުއަރީ 2024 ގައި މިނިސްޓްރީ އޮފް އިސްލާމިކް އެފެއާޒް އާއި މިނިސްޓްރީ އޮފް ހެލްތާ ދެމެދު ސޮއިކުރެވުނު ފަހުމުނާމާގެ ދަށުންނެވެ.

ބޯންމެރޯ ޓްރާންސްޕްލާންޓަކީ ތެލެސީމިއާ ބައްޔަށް އޮތް ހަމައެކަނި ދާއިމީ ފަރުވާއެވެ. މި ފަރުވާގެ ސަބަބުން ގަވާއިދުން ލޭ އެޅުން ހުއްޓާލެވި، ބަލިމީހާގެ ދިރިއުޅުމުގެ ފެންވަރު ރަނގަޅުވެގެންދެއެވެ.

އެގޮތުން އެޗް.އެލް.އޭ ޑޯނަރ މެޗިންގ މަރުހަލާ ފުރިހަމަ ކުރުމުން ފަރުވާއަށް ފުރުމުގެ ކަންތައްތައް ސަރުކާރުން ހަމަޖައްސައިދެއެވެ.