ރާއްޖޭގައި މިވަގުތު އެޗްއައިވީ ޖެހިފައިވާ 53 ދިވެހިން އެބަތިބި ކަމަށާއި، އޭގެ ތެރެއިން 22 މީހަކީ މިއަހަރު އަލަށް އެ ބައްޔަށް ޕޮޒިޓިވްވި މީހުން ކަމަށް ހެލްތު މިނިސްޓަރު ގީލާ ޢަލީ މިއަދު ވިދާޅުވެއްޖެއެވެ.

ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން މިނިސްޓަރު ވިދާޅުވީ، ރާއްޖެއިން މިހާތަނަށް ޖުމްލަ 71 ދިވެއްސަކަށް އެޗްއައިވީ ޖެހިގެން ރިޕޯޓުކޮށްފައިވާ ކަމަށެވެ. އަދި މިވަގުތު މި ބައްޔާއެކު ދިރިއުޅެމުންދާ 53 މީހުންނަށް ދައުލަތުގެ ފަރާތުން އެންމެ ޒަމާނީ ފަރުވާ މެދުކެނޑުމެއްނެތި ފޯރުކޮށްދެމުން އަންނަ ކަމަށްވެސް އެކަމަނާ ފާހަގަކުރެއްވިއެވެ.

މިއަހަރު އަލަށް އެޗްއައިވީ ޖެހުނު މީހުންގެ އަދަދު އިތުރުވެފައިވާ ސަބަބާ ގުޅޭގޮތުން ނޫސްވެރިއަކު ކުރި ސުވާލަކަށް ޖަވާބު ދެއްވަމުން މިނިސްޓަރު ވިދާޅުވީ، އެ ބަލި ގިނައިން ފެތުރިފައި ހުރީ ރައްކާތެރި ނޫން ގޮތުގައި ޖިންސީ ގުޅުން ހިންގުމުގެ ސަބަބުން ކަމަށެވެ.

"ފުރިހަމައަށް ރައްކާތެރިނުވެ ޖިންސީ ގުޅުން ބޭއްވުމުގެ ސަބަބުން އެކަކު ގައިން އަނެކަކު ގަޔަށް އަރާ ބައްޔެއްގެ ގޮތުގައި މިހާރު ވެސް އެންމެ ކޮމަން މޯޑު އޮފް ޓްރާންސްމިޝަނަކީ ރާއްޖޭގައި ބަލި ޖެހިފައި ތިބި މީހުން." މިނިސްޓަރު ވިދާޅުވި އެވެ.

މީގެއިތުރުން މިނިސްޓަރު ވިދާޅުވީ، ގަވާއިދުން ލޭ އަޅަންޖެހޭ މީހުންނާއި މަސްތުވާތަކެތި ބޭނުންކުރާ މީހުންނަކީވެސް އެޗްއައިވީގެ ނުރައްކާ އޮތް ބައެއް ކަމަށެވެ. ނަމަވެސް، ބަލި މީހުންގެ ގަޔަށް ލޭ އެޅުމުގެ ކުރިން ހަދަންޖެހޭ އެންމެހައި މުހިންމު ޓެސްޓުތައް ހަދައި، ރައްކާތެރިކަމުގެ ފިޔަވަޅުތައް އަޅަމުންދާ ކަމުގެ ޔަގީންކަން އެކަމަނާ ދެއްވިއެވެ.

ރާއްޖެއިން އެޗްއައިވީ ބަލިމީހެއް އެންމެ ފުރަތަމަ ފެނިފައިވަނީ މީގެ 35 އަހަރު ކުރިން، 1991 ވަނަ އަހަރުއެވެ. އޭގެފަހުން އަހަރަކު އެވްރެޖުކޮށް 3 އާއި 6 އާ ދެމެދުގެ އަދަދަކަށް ކޭސްތައް ރިޕޯޓުކުރެވެމުން ދިޔަ ނަމަވެސް، މިއަހަރު މިވަނީ ރެކޯޑު އަދަދަކަށް މީހުން ޕޮޒިޓިވް ވެފައެވެ.

"އަދިވެސް ދިވެހިރާއްޖެއަކީ ލޯ ޕްރިވެލެންޓް ކަންޓްރީއެއްގެ ގޮތުގައި ދުނިޔެއިން ފާހަގަކުރޭ. މާނައަކީ އާބާދީގެ 0.01 ޕަސެންޓޭ އަދިވެސް އެޗްއައިވީއަށް ހުށަހެޅި، އެޗްއައިވީއަށް ޑިޓެކްޓް ކުރެވެނީ،" މިނިސްޓަރު ވިދާޅުވި އެވެ.

ސަރުކާރުން އަންނަނީ މި ބައްޔާ ދެކޮޅަށް ރައްކާތެރިކަމުގެ ގޮތުން އަޅަންޖެހޭ ފިޔަވަޅުތައް ވަރުގަދަކޮށް، މުޖުތަމައު ހޭލުންތެރިކުރުމަށް ހާއްސަ މަސައްކަތްތަކެއް ކުރަމުން ކަމަށް ވަޒީރު މިއަދު ވިދާޅުވިއެވެ.