ދުބާއީން އިސްރާއީލުގެ ތެލްއަވީވަަށް ދަތުރުކުރި ފްލައިޑުބާއީގެ ފްލައިޓެއްގެ ކޮކްޕިޓް ތެރޭގައި ހިނގި ނުރައްކާތެރި ހަމަނުޖެހުމަކާ ގުޅިގެން، އެ ބޯޓު ސައޫދީ އަރަބިއްޔާއަށް ކުއްލި ހާލަތުގައި ޖައްސައިފިއެވެ.

މީޑިއާ ރިޕޯޓުތައް ބުނާ ގޮތުގައި ފްލައިޓް FZ1073 ގައި މި ހާދިސާ ހިނގާފައިވަނީ، އެ ބޯޓުގެ ކޯ-ޕައިލެޓް ކުއްލިއަކަށް ކެޕްޓަނަށް ވަޅިއަކުން ހަމަލާދީ ޒަޚަމްކޮށްލުމާ ގުޅިގެންނެވެ. އިސްރާއީލުގެ ކަމާބެހޭ އިދާރާތަކުން މިކަން ސިފަކޮށްފައިވަނީ، ބޯޓުގައި ތިބި އިސްރާއީލު ރައްޔިތުން މަރާލުމުގެ ބޭނުމުގައި ބޯޓު ވައްޓާލަން ދިން "ޓެރަރިސްޓް" ހަމަލާއެއްގެ ގޮތުގައެވެ.

ކޮކްޕިޓް ތެރޭގައި ހިނގި މި ކުރިމަތިލުމުގެ ތެރޭގައި، ބޯޓު ވަނީ ކުއްލިއަކަށް 34،000 ފޫޓުގެ އުސްމިނުން 17،000 ފޫޓަށްވުރެ ދަށަށް ވެއްޓިގެން ގޮސްފައެވެ. ނަމަވެސް، ކެބިން ކްރޫއިންނާއި ބޯޓުގެ ބައެއް މުވައްޒަފުން ވަގުތުން ކޮކްޕިޓަށް ވަދެ، ހަމަލާދިން ކޯ-ޕައިލެޓް ހިފަހައްޓައި، ބޯޓުގެ ކޮންޓްރޯލް އަލުން ވަނީ ހޯދާފައެވެ.

މި ހާދިސާއާ ގުޅިގެން ފްލައިޑުބާއީގެ މަތިންދާބޯޓު ސަލާމަތްތެރިކަމާއެކު ޖައްސާފައިވަނީ ސައޫދީ އަރަބިއްޔާގެ ތަބޫކް އެއާޕޯޓަށެވެ. އަދި ޒަޚަމްވި ކެޕްޓަނަށާއި ކޯ-ޕައިލެޓަށް ސައޫދީގެ ހޮސްޕިޓަލެއްގައި މިހާރު ދަނީ ފަރުވާދެމުންނެވެ. އޮފިޝަލުން ހާމަކުރި ގޮތުގައި މި ފްލައިޓުން ދަތުރުކުރި އިސްރާއީލުގެ 180 އަށްވުރެ ގިނަ ފަސިންޖަރުންނަށް އެއްވެސް ގެއްލުމެއް ނުލިބި ވަނީ ސަލާމަތްވެފައެވެ.

މި ހާދިސާއާ ގުޅިގެން އިސްރާއީލުގެ ނޭޝަނަލް ސެކިއުރިޓީ މިނިސްޓަރު އިތަމާރު ބެން ގްވީރު ވިދާޅުވީ، މިއީ އެ ގައުމުގެ 180 އަށްވުރެ ގިނަ ރައްޔިތުންގެ ފުރާނަ ދުއްވާލުމަށް އަމާޒުކޮށްގެން ދިން ޓެރަރިސްޓް ހަމަލާއެއް ކަމަށެވެ. މީގެއިތުރުން، އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ ވަނީ ސަލާމަތީ ކުއްލި ބައްދަލުވުމެއް ބާއްވަވައި، ސައޫދީ އަރަބިއްޔާގައި ތިބި އެ ގައުމުގެ ރައްޔިތުން އަނބުރާ ގެންދިއުމުގެ މަސައްކަތް ފައްޓަވާފައެވެ.