މާލޭގެ އަމީނީ މަގުގެ މަރާމާތު މަސައްކަތް ނިންމައި، ފުޑް ކޯޓު ސަރަހައްދު އާންމުންނަށް އަލުން މިރޭ ހުޅުވާލައިފިއެވެ.

އެމްޓީސީސީން ކުރިއަށް ގެންދާ މި މަޝްރޫއުގެ ތެރެއިން، ފުރަތަމަ ސެގްމަންޓަކީ ދިވެހިރާއްޖޭގެ އަޑުން ފެށިގެން ދަރުމަވަންތަ ހޮސްޕިޓަލާ ހަމައެވެ. އަދި ދެވަނަ ސެގްމަންޓަކީ ދިވެހިރާއްޖޭގެ އަޑު ކުރިމަތީ އޮންނަ ހަތަރުއަނގޮޅި ކަންމަތީގައި ތާރުއެޅުމެވެ.

އެމްޓީސީސީން ބުނީ، އަމީނީ މަގުގެ ސެގްމަންޓް 1 އަދި 2 ގެ މަސައްކަތް ނިންމައި އާންމުންނަށް މިރޭ އެމަގު ހުޅުވާލައިފައިވާކަމަށެވެ.

ކުރީގެ ރައީސް ސާލިޙްގެ ސަރުކާރުން 84.4 މިލިއަން ރުފިޔާ ހަރަދުކޮށްގެން ހެދި 1.79 ކިލޯމީޓަރުގެ މި މަގު، ނިންމިތާ ގިނަ ދުވަސްތަކެއް ނުވަނީސް ހަލާކުވެ، އަޑިގުޑަންވެ، ދުއްވާ ފަރާތްތަކަށް ބޮޑެތި ދަތިތަކަކާ ކުރިމަތިލާން ޖެހުނެވެ. އެހެންކަމުން، މި މައްސަލައަށް ހައްލެއް ހޯދުމުގެ ގޮތުން މި ސަރުކާރުން ވަނީ ފިޔަވަހިތަކަކަށް ބަހާލައިގެން މަގު އަލުން ތަރައްގީކުރުމުގެ މަސައްކަތް ފަށާފައެވެ.