ގަލްފް އެއާގެ ދަތުރުތައް އަންނަ މަހު ރާއްޖެއަށް ފަށަން ނިންމައިފި އެވެ.

ބަހްރެއިންގެ ގައުމީ އެއާލައިން، ގަލްފު އެއާ އިން ބުނީ، ޑިސެމްބަރު 12 ވަނަ ދުވަހުން ފެށިގެން ރާއްޖެއަށް އަލުން ދަތުރުތައް ފަށާނެ ކަމަށެވެ. މި ދަތުރުތަކުގައި ބޭނުންކުރާނީ އެ އެއާލައިނުން އެންމެ ފަހުން ގެނައި އެއާބަސް އޭ321 ނިއޯ އެލްއާރު މަރުކާގެ ބޯޓެއް ކަމަށާއި، މި ބޯޓުގައި އިކޮނޮމީ ކްލާސް 150 ސީޓާއި 16 ބިޒްނަސް ކްލާސް ސީޓު ހުންނާނެ ކަމަށް ގަލްފް އެއާ އިން މަޢުލޫމާތު ދެއެވެ.

ގަލްފް އެއާގެ ދަތުރުތައް މިދިޔަ އަހަރުގެ އޮކްޓޯބަރު މަހު ރާއްޖެއަށް ފެށުމަށްފަހު ކޯވިޑް-19 އާ ގުޅިގެން ދަތުރުތައް މެދުކަނޑާލުމާ ހަމައަށް ހަފްތާއަކު ފަސް ދަތުރު ރާއްޖެއަށް ވަނީ ކޮށްފައެވެ. އަދި އަލުން ދަތުރުތައް މިއަހަރުގެ ޑިސެމްބަރުގައި ފަށާއިރު ހަފްތާއަކު ދެ ދަތުރު ރާއްޖެއަށް ކުރުމަށް އެ އެއަރލައިނުން ވަނީ ހަމަޖައްސާފައެވެ.

ޖުލައި 15 ގައި ރާއްޖޭގެ ބޯޑަރ އަލުން ހުޅުވާލި ފަހުން މިހާތަނަށް 19 އެއާލައިނުން ރާއްޖެއަށް ދަތުރުތައް ވަނީ ފަށައިފަ އެވެ. އަދި މިމަހުގެ ތެރޭގައި އިތުރު ހަތަރު އެއާލައިނެއްގެ ދަތުރުތައް ފަށާނެ ކަމަށް ފަތުރުވެރިކަމާބެހޭ ވުޒާރާއިން މަޢުލޫމާތު ދެއްވައެވެ. މިވަގުތު މެދު އިރުމަތިން ރާއްޖެއަށް ދަތުރުކުރަމުންދަނީ އެމިރޭޓްސް، އިއްތިހާދު، ގަތަރު އަދި ފްލައި ދުބާއީންނެވެ.