އިންޑޮނޭޝިއާއަށް ނިސްބަތްވާ ސޫރިއާ މަނުރުންގް ކިޔާ 29 އަހަރުގެ ފިރިހެނަކީ މޫނުމަތީގެ އާދަކާދައާ ޚިލާފު ބައްޓަމަށް އަސަރުކުރާ ނާދިރު ޖެނެޓިކް ހާލަތެއް ކަމަށްވާ "ޓްރީޗަރ ކޮލިންސް ސިންޑްރޯމް" ތަހައްމަލު ކުރަމުންދާ މީހެކެވެ.

އޭނާގެ އާއިލާގެ ބައެއް އެހެން މެންބަރުންނަށްވެސް މި ހާލަތު މެދުވެރިވެފައިވާއިރު، އެ އާއިލާއިން އަންނަނީ ޓިކްޓޮކްގައި ބޮޑު މަގުބޫލުކަމެއް ހޯދަމުންނެވެ.

ސޫރިއާ ވަނީ 23 ސެޕްޓެމްބަރު 2022 ގައި އުމުރުން 19 އަހަރުގެ ޝާސާ ޕުސްޕިޓާ ދެވީއާ ކައިވެނިކޮށްފައެވެ. ކުލަގަދަ ނޫން ސާދާ ހަފްލާއެއްގައި ބޭއްވުނު މި ކައިވެނީގައި ދެމަފިރިން ބޭނުންކޮށްފައިވަނީ ފިޔާތޮށި ކުލައިގެ ހެދުމެކެވެ.

މި ކައިވެނީގެ ވީޑިއޯ ސޯޝަލް މީޑިއާގައި އާންމުވުމާއެކު ގިނަ ބައެއްގެ ސަމާލުކަން ވަނީ ލިބިފައެވެ.

ގިނަ ބަޔަކު އެ ދެމަފިރިންނަށް މަރުޙަބާ ކީނަމަވެސް، އެމީހުންގެ ދެމެދުގައި ހުރި 10 އަހަރުގެ އުމުރުގެ ތަފާތާއި، ޝާސާ އެފަދަ ސިފައެއް ހުރި މީހަކު ކައިވެންޏަށް ހިޔާރުކުރި ސަބަބާމެދު ބައެއް މީހުން ވަނީ ސުވާލު އުފައްދާފައެވެ.

ނަމަވެސް ސޫރިއާ ވަނީ މާތްﷲ އަށް ހަމްދުކޮށް، އޭނާއަށް "ޞާލިޙު އަދި ވަފާތެރި" އަންހެނަކު ބައިވެރިއެއްގެ ގޮތުގައި މިންވަރުކުރެއްވީތީ އުފާކުރާކަން ހާމަކޮށްފައެވެ.

ކައިވެންޏަށް ފަހު އެންމެ ތިން ދުވަސް ތެރޭގައި، ޝާސާ ވަނީ ދެމަފިރިން ފޮށިތައް ހިފައިގެން ޖަކާރުތާއަށް ދިއުމަށް ތައްޔާރުވާ މަންޒަރު ދައްކުވައިދޭ ވީޑިއޯއެއް ހިއްސާކޮށްފައެވެ. އަދި ސޫރިއާ އޭނާ ގޮވައިގެން ދަތުރަކުދާކަން ޝާސާ ވަނީ ހާމަކޮށްފައެވެ.

މި ދެމަފިރިންގެ ވާހަކައިން ހާމަވެގެންދަނީ ހަގީގީ ލޯބިއަކީ މީހެއްގެ ބޭރުފުށުގެ ސިފައަށް ބަލައި ނިންމާ ނިންމުމެއް ނޫންކަމާއި، އެއީ އެމީހަކު ހުރި ގޮތަށް ގަބޫލުކުރުން ކަމެވެ.