އެމެރިކާ ސިފައިންގެ މަނަވަރެއް
އެމެރިކާ ސިފައިންގެ މަނަވަރެއް
ބައިނަލްއަޤްވާމީ ޚަބަރުފަތުރާ ވަސީލަތްތަކުންނާއި އަސްކަރީ ރިޕޯޓުތަކުން ހާމަކޮށްފައިވާ ގޮތުގައި، މެދުއިރުމަތީގެ މަސްރަޙު ނުހަނު ނާޒުކު ފައްތަރަކަށް ގޮސްފައިވާ މި ދަނޑިވަޅުގައި، އެމެރިކާއިން އެ ސަރަޙައްދުގައި ޤާއިމުކޮށްފައިވާ އަސްކަރީ ބާރުތައް ވަނީ އާދަޔާޚިލާފަށް އިތުރުކޮށްފައެވެ.

އެގޮތުން، އެމެރިކާގެ އަސްކަރިއްޔާއިން މަތިންދާބޯޓު އުފުލާ ތިންވަނަ މަނަވަރުގެ ފައުޖު މެދުއިރުމައްޗަށް ފޮނުވާފައިވާއިރު، އެ ސަރަޙައްދުގައި ޤާއިމުވެތިބި އެ ޤައުމުގެ ސިފައިންގެ ޢަދަދު މިހާރު 53،000 އަށް އަރާފައިވާ ކަމަށް އެ ރިޕޯޓުތަކުގައި ވެއެވެ. ފަހުގެ ތާރީޚެއްގައި އެމެރިކާއިން މި ސަރަޙައްދަށް މިފަދަ ބޮޑު ލަޝްކަރަކާއި ޒަމާނީ ބަރުހަތިޔާރުތަކެއް ޖަމާކުރި މިއީ ފުރަތަމަ ފަހަރު ކަމަށްވާއިރު، މި ފިޔަވަޅުތަކުގެ ސަބަބުން މުޅި ސަރަޙައްދު އިތުރު ހަމަނުޖެހުމެއްގެ ތެރެއަށް ވެއްޓިދާނެކަމުގެ ކަންބޮޑުވުން ވަނީ އުފެދިފައެވެ.

އާންމުވެފައިވާ މަޢުލޫމާތުތަކަށް ބަލާއިރު، ރަތް ކަނޑާއި، މެޑިޓެރޭނިއަން ކަނޑުގެ އިތުރުން ފާރިސީ ކަނޑުއޮޅީގައި އެމެރިކާގެ އަސްކަރީ މަނަވަރުތައް މިހާރު ވަނީ ހަރަކާތްތެރިވާން ފަށާފައެވެ. މި މަނަވަރުތަކުގެ އިތުރުން، އެތައް ސަތޭކަ ހަނގުރާމަމަތީ ޖެޓުތަކާއި، ކްރޫޒް މިސައިލް އުފުލާ ޑިސްޓްރޯޔަރުތަކާއި ޒަމާނީ ވައިގެ ދިފާޢީ ނިޒާމުތައް ވެސް ވަނީ ތައްޔާރީ ޙާލަތަކަށް ގެނެސްފައެވެ.

ސަރަޙައްދުގައި ޙަރަކާތްތެރިވާ އެމެރިކާގެ 53،000 އަށްވުރެ ގިނަ ސިފައިން ބަހާލެވިފައިވަނީ، ޢިރާޤާއި ސީރިއާގެ އިތުރުން ޤަޠަރާއި ބަޙްރައިން ފަދަ ޤައުމުތަކުގައި ހުރި އެ ޤައުމުގެ އަސްކަރީ މަރުކަޒުތަކަށެވެ. މީގެ ސަބަބުން ކަނޑުގެ މަގުންނާއި، އެއްގަމާއި ވައިގެ މަގުންވެސް އެމެރިކާގެ އަސްކަރީ ޙާޟިރީ ވަނީ ފުޅާކޮށްފައެވެ.

އެމެރިކާގެ ދިފާޢީ ވުޒާރާއިން ހާމަކުރާ ގޮތުގައި، މި ފިޔަވަޅުތަކަކީ އީރާނާއި އެ ޤައުމާ ގުޅުންހުރި ބާރުތަކުން އިސްރާއީލަށާއި އެމެރިކާގެ މަޞްލަޙަތުތަކަށް ދީފާނެ ޙަމަލާތަކަކުން ދިފާޢުވުމަށާއި، ރަތް ކަނޑުގެ ކަނޑުދަތުރުފަތުރުގެ ސަލާމަތްތެރިކަން ކަށަވަރުކުރުމަށް އަޅާފައިވާ ފިޔަވަޅުތަކެކެވެ. ޚާއްޞަކޮށް ޣައްޒާގެ މައްސަލައާ ގުޅިގެން ސަރަޙައްދީ ނުތަނަވަސްކަން އިތުރުވެފައިވާ ދަނޑިވަޅެއްގައި މިފަދަ ފިޔަވަޅުތަކެއް އެޅުމުން މަސްރަޙު ވަނީ އިތުރަށް ނާޒުކުވެފައެވެ.

އެމެރިކާގެ މި އަސްކަރީ ޖަމާވުމާ ގުޅިގެން، އީރާނުގެ މަސްއޫލުވެރިން ވިދާޅުވެފައިވަނީ، އެ ޤައުމުގެ އިސްތިޤްލާލަށް އުނިކަން އަންނަ ފަދަ ކޮންމެ ޙަރަކާތަކަށް ނުވަތަ ޙަމަލާއަކަށް ފުރިހަމައަށް ރައްދުދިނުމުގެ ތައްޔާރީ ޙާލަތުގައި އީރާނުގެ ސިފައިން ތިބި ކަމަށެވެ.

މަސްރަޙު ދިރާސާކުރާ ފަރާތްތަކުން ދެކޭގޮތުގައި، ދެފަރާތުންވެސް އަސްކަރީ ބާރު ދެއްކުމަކީ ސުލްޙަޔަށް އޮތް ހުރަހެކެވެ. އަދި މިފަދަ ކުރިމަތިލުންތަކުގެ ސަބަބުން ބޮޑު ހަނގުރާމައެއް ފެށި، އޭގެ ނޭދެވޭ އަސަރު ސަރަޙައްދީ އަދި ބައިނަލްއަޤްވާމީ އިޤްތިޞާދަށާއި ސަލާމަތަށް ފޯރާނެ ކަމުގެ އިންޒާރު އެ ފަރާތްތަކުން ދެއެވެ.



ކިޔުންތެރިންގެ ހިޔާލު