ނ. މަގޫދޫގައި އަލަށް އިމާރާތް ކުރެވުނު މިސްކިތާއި، ށ. ފުނަދޫގައި އަލަށް ޢިމާރާތްކުރި މިސްކިތް ހުޅުވައިފިއެވެ.

ހައިމަން ކޮންސްޓްރަކްޝަން ޕްރައިވެޓް ލިމިޓެޑްގެ ފަރާތުން ޢިމާރާތް ކޮށްފައިވާ މި ދެ މިސްކިތް ހުޅުވައިދެއްވީ މިނިސްޓަރ އޮފް އިސްލާމިކް އެފެއާޒް ޑރ. އަޙްމަދު ޒާހިރު ޢަލީ އެވެ.

ސަރުކާރުގެ ބަޖެޓުން ޖުމްލަ 4.1 މިލިއަން ރުފިޔާ ޚަރަދުކޮށްގެން އިމާރާތްކޮށްފައިވާ ނ. މަގޫދޫ މަސްޖިދުލް އިސްރާ އަކީ 300 މީހުންގެ ޖާގައިގެ މިސްކިތެކެވެ. މިސްކިތުގެ މަސައްކަތް އެއްކޮށް ނިންމާލާފައިވަނީ މިދިޔަ ސެޕްޓެމްބަރު 30 ވަނަ ދުވަހުއެވެ.

މީގެ އިތުރުން ށ. ފުނަދޫގައި އަލަށް އިމާރާތްކުރި 500 މީހުންގެ ޖާގައިގެ މަސްޖިދުލް ރިޟްވާން މިސްކިތްވެސް އިސްލާމިކް މިނިސްޓަރ އިއްޔެވަނީ ހުޅުވައި ދެއްވައިފައެވެ.

ސަރުކާރުގެ ބަޖެޓުން 4.5 މިލިއަން ރުފިޔާ ޚަރަދުކޮށްގެން ޢިމާރާތް ކޮށްފައިވާ މި މިސްކިތުގެ މަސައްކަތް އެއްކޮށް ނިންމާލެވިފައިވަނީ މިދިޔަ ސެޕްޓެމްބަރ މަހުގެ 30 ވަނަ ދުވަހުއެވެ.

ސަރުކާރުގެ ދެ އަހަރު ދުވަހުގެ ތަރައްޤީގެ މަޝްރޫޢުތައް ދައްކާގޮތުން އިސްލާމިކް މިނިސްޓްރީން މިވަގުތުވެސް މިސްކިތްތައް އަޕްގްރޭޑް ކުރުމުގެ 5 މަޝްރޫޢެއް ކުރިއަށް ގެންދެއެވެ.