ކޯވިޑް-19 އާ ގުޅިގެން މާލެ ލޮކްޑައުން ކޮށްފައިވާތީ، އާސަންދައިން އޮންލައިން ކްލިނިކްތަކެއްގެ އިންތިޒާމް ހަމަޖައްސައިފިއެވެ.

އާސަންދައިން ނެރެފައިވާ ބަޔާނެއްގައި ވަނީ މާލެއިން ކޯވިޑް-19 އަށް މީހަކު ޕޮޒިޓިވްވެ، ކޮންޓެކްޓް ޓްރޭސިންއަށް މާލެސިޓީ ލޮކްޑައުންގެ ޙާލަތަށް ގެނެސްފައިވާތީ އާސަންދައިގެ ޚިދުމަތްދޭ މަރުކަޒުތަކާ ގުޅިގެން އޮންލައިން ކްލިނިކްތަކެއްގެ އިންތިޒާމް ހަމަޖައްސާފައިވާ ކަމަށެވެ.

މިގޮތުން މާލޭގައި އޮންލައިން 9 ކްލިނިކާއި، އައްޑޫސިޓީ ގައި 1 ކްލިނިކް ވަނީ ޤާއިމް ކޮށްފައެވެ.

މިޙާލަތުގައި ހުރިހާ ބޭފުޅުންވެސް، ތިމާ އާއި މުޖްތަމަޢުގެ ރައްކާތެރިކަމަށް އިސްކަންދެއްވާ، ކެތްތެރިކަމާއެކު މަޑުކުރެއްވުމަށް އާސަންދައިން ވަނީ އިލްތިމާސް ކޮށްފައެވެ.

މާލެ ސަރަހައްދު 24 ގަޑިއިރަށް ލޮކްޑައުން ކޮށްފައިވަނީ މާލެއިން ކޯވިޑް-19 އަށް މީހަކު ފައްސިވުމާ ގުޅިގެންނެވެ. އެމީހާ ބައްޔަށް ފައްސި ވެފައިވާކަން އެނގިފައިވަނީ މާލެ ފުލޫ ކްލިނިކަށް ދެއްކުމުން ކަމަށް އެޗްޕީއޭ އިން ހާމަކުރެއެވެ.