މީހެއްގެ ފަރާތުން ބަލީގެ އަލާމާތްތައް ފެނުނަސް އަދި ބައްޔަށް ޕޮޒިޓިވްވި ކަމުގައިވީ ނަމަވެސް ތަފާތުކުރުމެއްނެތި ފަރުވާގެ ކަންކަން އިންތިޒާމުކުރާނެ ކަމަށް ހެލްތު މިނިސްޓަރު އަބްދުﷲ އަމީން ވިދާޅުވެއްޖެއެވެ.

"އަޅުގަނޑު އިލްތިމާސްކުރަން މިވަގުތު ވެސް ރައްޔިތުން ކެތްތެރިކަމާއެކީގައި އަމަލުކުރަމުންދިއުން. އަދި އެއްބަޔަކު އަނެއްބަޔަކަށް އަޅާލުމާއި އޯގާތެރިކަމަކީ ވަރަށް މުހިންމު ކަމެއް. މިއަދު މިކަން ދިމާވި އާއިލާއަށް އޯގާތެރިވާން މިޖެހެނީ އަޅުގަނޑުމެން ކޮންމެ މީހެއްގެ އާއިލާގެ ތެރެއަށް މީގެ ނުރައްކާ އަތުވެއްޖެ ހިނދެއްގައި އެކަކު އަނެކަކަށް އަޅާލަން ޖެހޭ މިންވަރަށް. އެކަކު އަނެކަކާ ދޭތެރޭ އޯގާތެރިކަން ބަހައްޓަން ޖެހޭ މިންވަރަށް މިކަން ކުރަން ޖެހޭނީ،" މިނިސްޓަރު ވިދާޅުވިއެވެ.

މި ބަލީގެ ފަރުވާއަކީ ގޭގައި ތިބުން ކަމަށާއި އިޖުތިމާއީ ގައިދުރުކަން ކަމަށް ފާހަގަކުރަށްވަމުން މިނިސްޓަރ ވަނީ ބައްޔަށް ޝައްކުކުރެވޭ މީހުންނާމެދު ތަފާތުކުރުމެއްނެތި އެ ބަޔަކާ ދޭތެރޭގައި އޯގާތެރި ނަޒަރުން ބެލުމަކީ މުހިންމު ކަމެއް ކަމަށް ވިދާޅުވެފައެވެ.

ނޭޝަނަލް އެމަޖެންސީ އޮޕަރޭޝަންސް ސެންޓަރު (އެންއީއޯސީ)ގައި މިއަދު ހަވީރު ބޭއްވި ނޫސްވެރިންގެ ބައްދަލުވުމުގައި ހެލްތު މިނިސްޓަރު އަމީން އިތުރަށް ވިދާޅުވީ އާބާދީ ތެރޭގައި ފެތުރެން ފެށީމާ ދެން އެންމެ ބޮޑު އިސްކަމެއް ދޭން ޖެހެނީ ފެތުރޭ މިންވަރު ލަސްކުރެވޭނެ ގޮތަކަށް މަސައްކަތް ކުރުމަށެވެ.

"ރައްޔިތުންނަށް އަޅުގަނޑު އިލްތިމާސްކޮށްލަން ބޭނުންވަނީ މި ބަލީގެ ފަރުވާއަކީ ގޭގައި ތިބުން. މި ބަލީގެ ފަރުވާއަކީ އެކަކު އަނެކެއްގެ މެދުގައި ބަހައްޓަން ޖެހޭ ފިޒިކަލް ދުރުމިން ބެހެއްޓުން. މިވަގުތު އަޅުގަނޑުމެން ހާސްވެ، ކުއްލިއަކަށް ގޮސް ފިހާރައިގައި ހުންނަ ހުރިހާ އެއްޗެއް ގަނެ އަދި މިވަގުތު އަޅުގަނޑުމެން ކޮންމެހެން ކުރަން ނުޖެހޭ ކަންކަން ކުރަން ދިމާކޮށްފި ކަމަށްވާނަމަ، އޭގެ ސަބަބުން ބަލި އިތުރަށް ފެތުރުމަށް ހުރި ކަންކަމަށް ބޮޑަށް މަގުފަހިވެގެންދާނެ،" މިނިސްޓަރު ވިދާޅުވިއެވެ.

މިނިސްޓަރު އަމީން ވިދާޅުވީ އަންދާޒާކުރުންތަކަށް ބަލާއިރުގައި މި ދުވަސްވަރު މި ހިސާބު މިއީ ރާއްޖޭގެ ކޮމިއުނިޓީއަށް ފެތުރުމުގެ ފުރުސަތު އޮތް ދުވަސްވަރެއް ކަމަށް ފާހަގަކުރެވިފައިވާ ކަމަށާއި މިހާ ހިސާބަށް އައިސްފައިވާނީ އެ ލަފާކުރުންތަކަށް ބަލައިގެން ކަމަށެވެ.