މުއްދަތެއް ނެތް ގޮތަށް ސިވިލް ކޯޓު ބަންދުކޮށްފިއެވެ.

ސިވިލް ކޯޓުން މިއަދު ކުރި ޓުވީޓެއްގައި ބުނީ ކޯވިޑް-19 އަށް ޕޮޒިޓިވްވެފައިވާ މީހަކު މިއަދު މާލެއިން ފެނިފައިވާތީ އެހެން ގޮތަކަށް ކަނޑައަޅަންދެން މިއަދު 11:45 އިން ފެށިގެން އެ ކޯޓު ބަންދުކުރެވިފައިވާ ކަމަށެވެ. އަދި މިހާރު ކޯޓުގައި ތާވަލުކޮށްފައިވާ މައްސަލަތައް ކެންސަލްކޮށްފައިވާ ކަމަށް ވެސް ސިވިލް ކޯޓުން ބުނެއެވެ.

ކޯވިޑް-19 އަށް މާލެއިން ދިވެއްސަކު ޕޮޒިޓިވްވުމާއެކު ހެލްތު ޕްރޮޓެކްޝަން އެޖެންސީ (އެޗްޕީއޭ)އިން ވަނީ 24 ގަޑިއިރަށް މާލެ ލޮކްޑައުންކޮށްފައެވެ. އަދި ލޮކްޑައުންގެ ހާލަތުގައި މީހުން ނުކުމެ އުޅުމާއި، އުޅަނދުފަހަރު ފުރުން ވެސް ވަނީ މަނާކޮށްފައެވެ.

ކޮވިޑް-19 އަށް ޕޮޒިޓިވް ވެފައިވާ ފަރާތެއް މިއަދު މާލެ އިން ފެނިފައިވާތީ، އެހެންގޮތަކަށް ކަނޑައަޅަންދެން މިއަދު 11:45 ން ފެށިގެން މިކޯޓު ބަންދުކުރެވިފައިވާކަމަށާއި، ކޯޓުގައި ތާވަލުކޮށްފައިވާ މައްސަލަތައް ކެންސަލްކުރެވިގެންވާ ކަމުގައި ދެންނެވީމެވެ.

— MV Civil Court (@MVCivilCourt) April 15, 2020

އެޗްޕީއޭއިން ބުނީ މިއަދު މާލެއިން ކޮވިޑް 19އަށް ޕޮޒިޓިވްވި މީހާއާ ބައްދަލުވި 54 މީހަކު ފާހަގަވެފައިވާ ކަމަށެވެ.،އޭގެތެރެއިން 11 މީހެއްގެ ސާމްޕަލް ނަގައި ކޮންޓެކްޓް ޓްރޭސިންގެ މަސައްކަތްވެސް ވަނީ ފަށައިފައެވެ.