މިއީ އެންމެން އެކުގައި ކުރަންޖެހޭ ހަނގުރާމައެއް ކަމަށާއި އަޅުގަނޑުމެން ކުރިމަތިލާން ޖެހިފައިވަނީ އެންމެ ދުޝްމަނަކާ ކަމުގައި އޭޑީކޭގެ ޑޮކްޓަރު އަބްދުﷲ ނިޔާފް ވިދާޅުވެއްޖެއެވެ.

ނިޔާފް މިހެން ވިދާޅުވީ ފުރަތަމަ ފަހަރަށް މާލެއިން ދިވެއްސަކު ކޯވިޑް-19 އަށް ފައްސިވުމާ ގުޅިގެން ކުރެއްވި ޓްވީޓެއްގައެވެ. ޑރ. ނިޔާފް ވިދާޅުވީ މިވަގުތަކީ އެއްބައިވަންތަ ވާންވީ ވަގުތުކަމަށާއި ޚިޔާލު ތަފާތުވުންތައް ދޫކޮށްލަން ޖެހޭ ކަމަށެވެ.

"އަހަރެމެންގެ ދުޝްމަނަކީ އެކަކު. އެއީ ކޯވިޑް-19. އެކަކު އަނެކަކަށް އަޅާލާ އެހީވޭ، އަވަށްޓެރިންގެ ހާލު ބައްލަވާ. މިއީ ޚިޔާލުތަފާތުވުންތައް ދޫކޮށްލާފައި އެކުވެރިވާންވީ ވަގުތު.. އެކަކު އަނެއްކަކަށް އަޅާލާ އެހީތެރިވެދޭންވީ ވަގުތު. ސަލާމަތީ ހުރިހާ ފިޔަވަޅުތަކެއް އަޅުއްވައިގެން ގޭގައި މަޑުކުރައްވާ. އިންޝާﷲ، އަޅުގަނޑުމެން މިކަމުން ސަލާމަތް ވާނެ." ޑރ. ނިޔާފް ވިދާޅުވިއެވެ.

މިއަދު މާލެއިން ކޮވިޑް-19 އަށް ފައްސިވެފައި ވަނީ މާލެ ފުލޫ ކްލިނިކަށް ދައްކަން ދިޔަ މީހެކެވެ. މިއީ މާލޭ ތެރެއިން ފައްސިވި ފުރަތަމަ މީހާއެވެ.

އެޗްޕީއޭއިން ބުނީ އޭނާ އައިސޮލޭޝަން ފެސިލިޓީއަށް ގެންގޮސް ފަރުވާގެ މަސައްކަތް ފަށާފައިވާ ކަމަށާއި، އޭނާއާއި ކޮންޓެކްޓްވި މީހުން ފާހަގަކޮށް އެމީހުންގެ ސާމްޕަލް ނަގަމުން ގެންދާ ކަމަށެވެ.