މި ހާލަތުގައި އެކަކު އަނެކަކަށް އެހީތެރިވެދީ އެންމެން ގުޅިގެން މިކަމުން ސަލާމަތްވެވޭނެ ކަމުގައި ރައީސުލްޖުމްހޫރިއްޔާގެ ނާއިބު ފައިސަލް ނަސީމް ވިދާޅުވެއްޖެއެވެ.

މިއަދު މާލެއިން ކޯވިޑް-19 އަށް ދިވެއްސަކު ޕޮޒިޓިވްވުމާއި ގުޅިގެން ކުރެއްވި ޓްވީޓެއްގައި ރައީސުލް ޖުމްހޫރިއްޔާގެ ނާއިބު ފައިސަލް ނަސީމް ވިދާޅުވީ މި ވަގުތަކީ ހުރިހާ ރައްޔިތުންވެސް ކެތްތެރިވާންވީ ވަގުތެވެ. އަދި ކަމާއިބެހޭ އިދާރާތަކުން ކޯވިޑް-19 އާ ގުޅިގެން ދެމުން ގެންދާ އިރުޝާދުތަކަށް ބޯލެނބުމަށް އެމަނިކުފާން ވަނީ އިލްތިމާސް ކުރައްވާފައެވެ.

މިކަމުން އަރައިގަނެވޭނީ އެންމެންގެ ވެސް އެއްބާރުލުން ލިބިގެން ކަމަށާއި، މި ދަނޑިވަޅުގައި ކެތްތެރިވެ ކަމާބެހޭ އިދާރާތަކުން ދެމުން ގެންދާ އިރުޝާދުތަކަށް ބޯލެނބުމަށް ރައީސުލްޖުމްހޫރިއްޔާގެ ނާއިބު ގޮވާލެއްވިއެވެ.

ރައީސުލްޖުމްހޫރިއްޔާގެ ނާއިބު މިފަދައިން ވިދާޅުވިއިރު ރައީސުލްޖުމްހޫރިއްޔާ އިބްރާހީމް މުހައްމަދު ޞާލިޙް ވެސް މިއަދު ވަނީ ހުރިހާ ރައްޔިތުންގެ އެއްބާރުލުން މިކަމަށް ދެއްވުމަށް އެދިވަޑައިގެންފައެވެ.

ޤައުމާއި މުޚާތަބު ކުރައްވާ ރައީސް ޞާލިޙް ވިދާޅުވީ ކޯވިޑް-19 ފެތުރިގެން ހިނގައިދާނެ ޙާލަތަކަށް ސަރުކާރު އޮތީ ފުރިހަމަ އަށް ތައްޔާރަށް ކަމަށެވެ. އަދި ދައުލަތުގެ މުއައްސަސާތަކުން އަންނަނީ މިފަދަ ޙާލަތަކަށް ވަރަށް ބޮޑަށް ތައްޔާރުވަމުން ކަމަށްވެސް ރައީސް ވިދާޅުވިއެވެ.

ރައީސް ވިދާޅުވީ މުޅި މުޖުތަމަޢުގެ ރައްކާތެރިކަމަށް އެންމެން އެކުގައި މަސައްކަތް ކުރުމަކީ ވަރަށް މުހިއްމު ކަމެއް ކަމަށާއި ކެތްތެރިކަމާއި ޙިކުމަތްތެރިކަމާއެކު، އެކުގައި މަސައްކަތްކުރުމުން މިކަމުން އަރައިގަނެވޭނެ ކަމަށެވެ.

މިއަދު މާލެއިން މީހަކު ކޯވިޑް-19 އަށް ފައްސިވުމާ ގުޅިގެން ސަރުކާރުންވަނީ މުޅިމާލެ 24 ގަޑިއިރަށް ލޮކްޑައުން ކޮށްފައެވެ.