ރާއްޖޭގައި ޖެހިލުމެއްނެތި މީހުން މަރަން ކެރޭ 1369 މީހުން އެބަތިބި ކަމަށް ކޮމިޝަނަރ އޮފް ޕޮލިސް މުޙައްމަދު ޙަމީދު ވިދާޅުވެއްޖެއެވެ.

މިރޭ ބޭއްވި ނޫސްވެރިންގެ ބައްދަލު ވުމުގައި ސީޕީ ޙަމީދު ވިދާޅުވީ، ޖެހިލުމެއްނެތި މީހުން މަރަން ކެރޭ 1369 މީހުން އެބަތިބި ކަމަށާއި، އެއީ ކޮން ރަށެއްގެ ކޮން ބައެއްކަން ފުލުހުންނަށް އެނގޭކަމަށެވެ.

ރާއްޖޭގައި އިސްލާމްދީނަށް ގޮންޖަހާ އެކި ފަރާތްތަކުން ހިންގާ އަމަލުތަކުގެ މައްސަލަތައް އެންމެ އިސްކަންދޭ މައްސަލަތަކުގެ ގޮތުގައި ފުލުހުން ބަލަމުން ގެންދާކަން ފާހަގަ ކުރައްވަމުން އެފަދަ މައްސަލަތަކަށް ފުލުހުން ދޫނުދޭނެ ކަމަށް ސީޕީ ވިދާޅުވިއެވެ. މިގޮތުން މިފަހުން އެންމެ ބޮޑު މައްސަލަ އެއްގެ ގޮތުގައި ފެންމަތިވި އެމްޑީއެންގެ މައްސަލަވެސް އަންނަނީ ބަލަމުން ކަމަށާއި، އެމައްސަލާގައި ފުލުހުންގެ ދައުރު ފުލުހުން އަދާކުރަމުން އަންނަ ކަމަށް ސީޕީ ވިދާޅުވިއެވެ.

ދިވެހި ރާއްޖޭގައި އިސްލާމް ދީނަށް ހަޖޫ ޖެހުމަކީ ކުށެއް ކަމަށާއި، އިސްލާމްދީނަށް ފުރައްސާރަކުރި މައްސަލައެއްގައި މިދިޔަ ހަފުތާގައިވެސް މީހަކަށް ދައުވާކުރެވުނު ކަމަށް ސީޕީ ޙަމީދު ވިދާޅުވިއެވެ.

ޙާލަތުގެ ނާޖާއިޒް ފައިދާ ބައެއް ފަރާތްތަކުން ނަގަން މަސައްކަތް ކުރާކަން ފާހަގަކުރައްވައި ސީޕީ ވިދާޅުވީ ލ. ގަމުގައި އަޅާފައި އޮތް ފުލުހުންގެ ލޯންޗަކާއި، އަދި މަހިބަދޫ ފަޅުގައި އަޅާފައި އޮތް ފުލުހުންގެ ލޯންޗެއްގައި ރޯކޮށްލާފައިވަނީ ބަޔަކު ގަސްދުގައި ކަމަށާއި، މި މައްސަލަތައް ފުލުހުން މިހާރު ތަހުޤީޤު ކުރަމުން އަންނަ ކަމަށެވެ.