ކޯވިޑް-19 އާ ގުޅިގެން ރާއްޖޭން ބޭރުން އައި މީހުންގެ ތެރޭގައި ހިމެނޭ، މާލޭގެ ބޮޑުންނާއި، ސަރުކާރުގެ އިސް ބޭފުޅުންގެ އާއިލާތައް ކަރަންޓީން މަރުކަޒްތަކަށް ނުގެންގޮސް މާލެ ތެރެއަށް ދޫކޮށްލި ކަމަށް ބުނެ ފަތުރަނީ ދޮގުވާހަކައެއް ކަމުގައި ރައީސް އޮފީހުގެ ޗީފް އޮފް ސްޓާފް ޝައިޚް އަލީ ޒާހިރު ވިދާޅުވެއްޖެއެވެ.

އަލީ ޒާހިރު މިހެން މި ވިދާޅުވީ ރާއްޖޭން ބޭރުން އައި މީހުންގެ ތެރޭގައި ސަރުކާރުގެ އިސް ބޭފުޅުންގެ އާއިލާތައް ހިމެނޭ ކަމަށާއި، އެ ފަރާތްތައް ކަރަންޓީނު ނުކޮށް ދޫކޮށްލާފައިވާ ކަމަށް މީސް މީޑިއާގައި ބައެއް ފަރާތްތަކުން ފަތުރަމުންދާ ވާހަކަތަކާ ގުޅުވައިގެންނެވެ.

ޢަލީ ޒާހިރު މިރޭ ކުރެއްވި ޓްވީޓެއްގައި ވިދާޅުވެފައިވަނީ މާލޭގެ ބޮޑުންނާއި ސަރުކާރުގެ މަތީ މީހުންގެ އާއިލާތައް "މާލެ ތެރެއަށް ދޫކޮށްލިއޭ" ބުނެ ފަތުރަނީ 100 ޕަސެންޓު ދޮގު ވާހަކައެއް ކަމަށެވެ.

"އެންމެ މީހެއްގެ މައުލޫމާތު ދެއްވާ. ހަމަ ޔަގީން އެންމެ މީހެއްގެ މައުލޫމާތު ވެސް ނުދެވޭނެކަން" އަލީ ޒާހިރުގެ ޓްވީޓްގައި ވިދާޅުވެފައިވެއެވެ.

އަލީ ޒާހިރު މި ވާހަކަތައް ދޮގުކުރައްވާފައިވާއިރު، މާލެ އިން މިހާރު ވަނީ ތިން މީހަކު ކޮވިޑް-19 އަށް ފައްސި ވެފައެވެ. އޭގެތެރޭގައި ހިމެނެނީ ދެ އަންހެނުންނާއި ކުޑަ ކުއްޖެކެވެ. އަދި މި މީހުންގެ ކޮންޓެކްޓް ޓްރޭސިން ނުވަތަ އެމީހުންނާ ބައްދަލުވެފައިވާ މީހުން ދެނެގަތުމުގެ މަސައްކަތަށް މާލެ މިވަގުތު އޮތީ ލޮކްޑައުންގައެވެ. މި މައްސަކަތުގެ ތެރޭގައި ހިމެނިގެން މާލެއާއި ހުޅުމާލެއާއި ތ. މަޑިފުށްޓާއި އައްޑޫ ސިޓީ ހިތަދޫއާއި ކ. ކާށިދޫ އަދި ހއ. ވަށަފަރު ހިމެނޭ ގޮތަށް ޖުމްލަ 22 ތަނެއް ވަނީ މޮނިޓަރިންގެ ހާލަތަށް ގެނަސްފައެވެ.