ރާއްޖޭގައި ހަލުވިކަމާއެކު ކޯވިޑް-19 ފެތުރެން ފެށީ އިރުޝާދުތަކަށް ކަމޭނުހިތާތީ ކަމަށް ރާއްޖޭގެ ކުރީގެ ރައީސުލް ޖުމްހޫރިއްޔާ ރައީސް އަލް އުސްތާޛް މައުމޫނު ޢަބްދުލްގައްޔޫމު ވިދާޅުވެއްޖެއެވެ.

ކޯވިޑް-19 ރާއްޖޭގެ މުޖުތަމައަށް ފެތުރެން ފަށައި، ކޯވިޑް-19 އަށް ޕޮޒިޓިވްވި 7 މީހުން މިހާތަނަށް މާލޭން ފެނިފައި ވަނިކޮށް، އެކަމުގެ ހިތާމަ ފާޅު ކުރައްވައި ރައީސް މައުމޫނު މިއަދު ކުރެއްވި ޓުވީޓެއްގައި ވިދާޅުވީ، ރާއްޖޭގައި ކޮވިޑް 19 ފެތުރެން ފެށީ، އިރުޝާދުތަކަށް ކަމޭނުހިތާތީ އާއި އަމިއްލަ އިހުމާލުން ކަމަށެވެ. އެހެންކަމުންދެންވެސް ގޭގައި ތިއްބެވުމަށް އެމަނިކުފާނު ވަނީ އެދިވަޑައިގެންފައެވެ.

"ހިތާމައާ އެކު ދަންނަވަން ރާއްޖޭގައި ހަލުވިކަމާއެކު ކޯވިޑް ފެތުރެން އެފެށީ އިރުޝާދުތަކަށް ކަމޭނުހިތާތީ. އަމިއްލަ އިހުމާލުން. ދެންވެސް ގޭގައި ތިއްބަވާ. ޖިސްމާނީ ދުރުމިން ހިފަހައްޓަވާ! ﷲގެ ރަޙްމަތަށް އެދެން،" ރައީސް މައުމޫނުގެ ޓުވީޓްގައި ވިދާޅުވެފައި ވެއެވެ.

މާލެއިން ކޯވިޑް-19 އަށް ފުރަތަމަ މީހަކު ޕޮޒިޓިވްވީ މިދިޔަ ބުދަ ދުވަހުއެވެ. ޕޮޒިޓިވް ވި އެ އަންހެން މީހާގެ ތުއްތު ދަރިފުޅުވެސް ޕޮޒިޓީވް ވިކަން އެދުވަހު އެނގުނެވެ. އޭގެ އިތުރުން އެމީހުންނާ ކޮންޓެކްޓްވި އިތުރު މީހަކު ވެސް ޕޮޒިޓިވް ވި ކަން އެރޭ ދަންވަރު އެޗްޕީއޭއިން ހާމަކުރެއްވިއެވެ.

އޭގެ ތެރެއިން ތިންވަނައަށް ޕޮޒިޓިވްވި މީހާއާ ބައްދަލުވި ދެ މީހަކު ވެސް ކޮވިޑަށް ޕޮޒިޓިވް ވެފައިވާކަން ރޭ ދަންވަރު ވަނީ އެނގިފަ އެވެ. އަދި އިތުރު މީހަކު ޕޮޒިޓިވް ވެފައިވާކަން މިއަދު އެޗްޕީއޭ އިން ހާމަކުރެއްވިއެވެ.

މާލެއިން ޕޮޒިޓިވް ވި 7 މީހުންނާއެކު ރާއްޖެއިން ކޮވިޑަށް ޕޮޒިޓިވް ވި މީހުންގެ އަދަދު ވަނީ 27 އަށް އަރައިފައެވެ. އޭގެ ތެރެއިން މިހާތަނަށް 16 މީހުން ބަލިން ރަނގަޅުވެފައިވާ އިރު، ދެ މީހަކު ޕޮޒިޓިވް ވިކަން އެނގުނީ އެމީހުން ރާއްޖެއިން ފުރި ފަހުންނެވެ.

މުޖުތަމައު ތެރެޔަށް ކޯވިޑް-19 ފެތުރުމާއި ގުޅިގެން މިދިޔަ ބުދަ ދުވަހު މާލެ ސަރަޙައްދު ލޮކްޑައުން ކުރުމަށްފަހު، މިރޭ އިރުއޮއްސި 6 އިން ފެށިގެން ރާއްޖޭގެ ހުރިހާ ރަށަކަށް އަރާފޭބުން މަނާކުރުމަށް އެޗްޕީއޭ އިން ވަނީ ނިންމަވާފައެވެ.