ސޯޝަލް މީޑިއާގައި އެއްވެސް ހަގީގަތެއް ނެތް ވާހަކަތަކެއް އެބަ ދައުރުވާ ކަމަށާއި އެވާހަކަތައް އާންމު މީޑިއާތަކުން ނުގެނެސްދިނުމަށް ކޯވިޑް-19 ޓާސްކްފޯސްގެ ތަރުޖަމާނު މުޙައްމަދު މަބްރޫކް ޢަޒީޒް ވިދާޅުވެއްޖެއެވެ.

ކޯވިޑް-19 ގެ އެންމެ ފަހުގެ މަޢުލޫމާތު ހާމަކުރުމަށް މިއަދު ބޭއްވި ނޫސްވެރިންގެ ބައްދަލުވުމުގައި މަބްރޫކް ވިދާޅުވީ ސޯޝަލް މީޑިއާގައި އެއްވެސް ހަގީގަތެއް ނެތް ވާހަކަތަކެއް ދައުރުވަމުން ދާ ކަމަށާއި އޭގެ ސަބަބުން ރައްޔިތުންގެ މެދުގައި ވަރަށްބޮޑު ނުތަނަވަސްކަމާއި ބިރުބެރިކަން އުފެދެމުންދާކަމަށެވެ. އެއީ ބަޔަކު ގަސްތުގައި ރާވައިގެން ކުރަމުންދާ ކަމެއްކަމަށް މަބްރޫކް ތުހުމަތު ކުރެއްވިއެވެ.

"ދެން ހުސްބުޅި އެއްލީމަ މަސް ގަންނަނީ. މަދު ފަހަރެއްގަ ކަމެއް ހަގީގަތަކަށް ވަނީ. ކޭސްއެއް ޕޮޒިޓިވްވެގެން އަޅުގަނޑުމެން ނާންގަ ތިބީ ކޮންއިރަކުތޯ؟ ރޭގަނޑު ދަންވަރު ވެސް ކަމެއް ހިނގައިފިއްޔާ މިދަނީ އަންގަމުން. މީޑިއާތަކުން ވެސް އެފަދަ ކަންކަމަށް ބަރޯސާ ނުވުމަށް އެދެން." މަބްރޫކް ވިދާޅުވިއެވެ.

އައްޑޫއިން މީހަކު ޕޮޒިޓިވްވި ކަމަށް ސޯޝަލް މީޑިޔާގައި ދެކެވޭ ވާހަކަތަކަށް ރައްދު ދެއްވަމުން މަބްރޫކް ވިދާޅުވީ، އެއީ ދޮގެއް ކަމަށާއި، އަދި އައްޑޫއިން މީހަކު ބައްޔަށް ޕޮޒިޓިވް ވެފައި ނުވާ ކަމަށެވެ.

"ދޮގު މައުލޫމާތު ނުފަތުރާ. ބަޔަކު މިގޮތަށް ހަބަރު ފެތުރީމަ މީހުން އެބަ ކަންބޮޑުވޭ. ކަމެއް ސާފުކުރަން ބޭނުންނަމަ 1676 އަށް ގުޅައި، ނޫނީ މެސެޖް ކުރޭ. ރައްޔިތުންނަށް ހެވެއް އެދެންޏާ އަމަލުކުރާނީ އެގޮތަށް." މަބްރޫކް ވިދާޅުވިއެވެ.

މާލެއިން މިހާތަނަށް ވަނީ ކޯވިޑް-19 އަށް ޕޮޒިޓިވް 8 މީހުން ފެނިފައެވެ. އެއާ އެކު ރާއްޖެއިން މި ބަލި ޖެހުނު މީހުންގެ ޢަދަދު ވަނީ 28 އަށް އަރާފައެވެ.