ހިންދީ ފިލްމު ޖުގްޖުގްޖިޔޯގެ ލީޑު ރޯލުން ފެނިގެންދާ ތަރިންގެ ތެރެއިން ވަރުން ދަވަން، އަނިލް ކަޕޫރް އަދި ނީތޫ ކަޕޫރް ކޮވިޑަށް ޕޮޒިޓިވްވެއްޖެކަމަށް ފިލްމްފެއަރ އިން ހާމަކޮށްފިއެވެ.

ފިލްމްފެއަރ އިން ހާމަކޮށްފައިވާގޮތުން ފިލްމުގެ ލީޑް ރޯލުން ފެނިގެންދާ ވަރުން ދަވަން އަދި ނީތޫ ކަޕޫރްގެ އިތުރުން، ފިލްމުގެ ޑިރެކްޓަރ ރާޖް މެހެތާވެސް ވަނީ ކޮވިޑަށް ޕޮޒިޓިވްވެފައެވެ. ވަރުން ދަވަން، އަނިލް ކަޕޫރް، ނީތޫ ކަޕޫރް އަދި ޑިރެކްޓަރ ރާޖް މެހެތާ ކޮވިޑަށް ޕޮޒިޓިވް ވެފައިވަނީ، ހިންދީ ފިލްމު ޖުގްޖުގްޖިޔޯގެ ޝޫޓިންގްގައި އިންޑިޔާގެ ޗަންދިގަރް ސިޓީ ގައި ހަރަކާތްތެރިވަނިކޮށެވެ.

މިއާއެކު މި ފިލްމުގެ ޝޫޓިން މެދުކަނޑާލާފައި ވާކަމަށް ފިލްމްފެއަރ އިން ހާމަކޮށްފައިވެއެވެ. ނަމަވެސް އަދި މިކަމާ ބެހޭގޮތުން ވަރުން ދަވަން، އަނިލް ކަޕޫރް، ނީތޫ ކަޕޫރް އަދި ފިލްމު އުފައްދާ ކުންފުނިންވެސް ބަހެއް ބުނެފައެއްނުވެއެވެ.

އިންޑިޔާގައި ކޮވިޑު ޖެހޭމީހުންގެ އަދަދު ކޮންޓްރޯލް ކުރެވިފައި ނުވިނަމަވެސް، އިގްތިސާދައް ކޮށްފައިވާ އަސަރުގެ ސަބަބުން ލޮކްޑައުންގެ ހާލަތަށް ބޮޑެތި ލުއިތަކެއްދީ ދަތުރުފަތުރު ކުރުމާއި، ވިޔަފާރިތައް ހިންގުމާއި، ސިނަމާތައް ހިންގުމާއި ފިލްމު އުފެއްދުމުގެ މަސައްކަތް ކުރިއަށް ގެންދިއުމަށް ވަނީ ހުއްދަ ދީފައެވެ. މިއާއެކު ދަރްމާ ޕްރޮޑަކްޝަން ކުންފުނީގެ ޖުގްޖުގްޖިޔޯ ފިލްމުގެ ޝޫޓިންގ ވެސް ވަނީ ފަށާފައެވެ.

ޖުގްޖުގްޖިޔޯ ފިލްމު ވެގެންދާނީ ފިލްމު ކުޅުން މެދުކަނޑާލުމަށްފަހު އެތައް އަހަރަކަށް ފަހު ނީތޫ ކަޕޫރް އަލުން ފިލްމީ ދާއިރާއިން ފެނިގެންދާނެ ފިލްމަކަށެވެ. މިފިލްމުގައި ނީތޫ ކަޕޫރްގެ އިތުރުން ވަރުން ދަވަން، އަނިލް ކަޕޫރް، ކިއާރާ އަދްވާނީ އަދި ޕްރަޖަކްތާ ކޮލީ ފެނިގެންދާނެއެވެ.