ފޯބްސް މެގަޒިން އިން އަހަރަކު އެއްފަހަރު ނެރެމުންދާ ޔޫޓިއުބް އިން އެންމެ ގިނަ ލާރި ހޯދާ މީހުންގެ ލިސްޓުގެ އެންމެ ކުރީގައި 9 އަހަރުގެ ކުއްޖަކު ހިމެނިއްޖެއެވެ.

ފޯބްސް މެގަޒިންގެ ލިސްޓުގެ އެންމެ ކުރީގައި އުޅޭ 9 އަހަރުގެ ރަޔަން ކާޖީގެ ޔޫޓިއުބްގެ ވީޑިޔޯތަކުން މިއަހަރު 30 މިލިއަނެއްހާ ޑޮލަރު އޭނާއަށް ލިބިފައިވެއެވެ. މިއާއެކު ރަޔަން މިވަނީ މިއަހަރު ޔޫޓިއުބުން އެންމެ ގިނަ ލާރި ލިބުނު މީހުންގެ ލިސްޓުގެ އެއްވަނައަށް އަރައިފައެވެ.

'ރަޔަންސް ވޯލްޑް' ގެ ނަމުން ނަންދެވިފައިވާ ރަޔަން ކާޖީގެ ޔޫޓިއުބް ޗެނަލަށް 41.7 މިލިއަން މީހުން ސަބްސްކްރައިބް ކޮށްފައިވާއިރު، އޭނާގެ ވީޑިޔޯތައް 12.2 ބިލިއަން ފަހަރު އެކި މީހުން ވަނީ ބަލާފައެވެ. ރަޔަން އޭނާގެ ޔޫޓިއުބް ވީޑިޔޯ ތަކުގައި ގޭމް ރިވިޔު ކުރުމާއި، އެކި ކަހަލަ ކުޅޭ ސާމާނު ރިވިއު ކުރުމުގެ އިތުރުން އެކި ކަހަލަ ކުޅޭ ސާމާނު ބަންދުކޮށްފައި ހުންނަ ފޮށިން ކަނޑައި އެބޭނުން ކުރާތަން ދައްކުވައިދެއެެވެ.

ޔޫޓިއުބަށް ވީޑިޔޯ ލުމުގެ އިތުރުން ރަޔަން ވަނީ އޭނާގެ ނަމުން ބްރޭންޑް ކުރެވިފައިވާ ކުޅޭ ސާމާނާއި، ކުޑަކުދިން ގަޔާވާ ފަދަ އެކި ކަހަލަ ތަކެތި، އެމޭޒަން، ވޯލްމާރޓް އަދި ޓާރގެޓް ފަދަ ތަންތަނުގައި ވިއްކާފައެވެ. މިގޮތުން ވިއްކާފައިވާ ތަކެތިން މިދިޔަ އަހަރު އެކަނިވެސް 200 މިލިއަން ޑޮލަރު، ރަޔަން އަށް ލިބިފައިވާކަމަށްވެއެވެ.

މީގެ އިތުރުން ކުޑަކުދިންގެ ޓީވީ ޗެނަލް ނިކަލޯޑިއެން އާއެކު 'ރަޔަންސް މީސްޓަރީ ޕްލޭ ޑޭޓް' ގެ ނަމުން ނަންދެވިފައިވާ ޓީވީ ސީރީސް އެއް ގެނަސް ދިނުމަށް ވެސް ރަޔަން ސޮއި ކޮށްފައިވާކަމަށް ފޯބްސް މެގަޒިން އިން ހާމަކޮށްފައިވެއެވެ.

ފޯބްސް މެގަޒިން އިން އަހަރަކު އެއްފަހަރު ނެރެމުންދާ ޔޫޓިއުބް އިން އެންމެ ގިނަ ލާރި ހޯދާ މީހުންގެ ލިސްޓުގެ އެންމެ ކުރީގައި މިދިޔަ އަހަރުވެސް ހިމެނިފައިވަނީ ރަޔަން ކާޖީ އެވެ.

ރަޔާން ކާޖީ ގެ އިތުރުން މިއަހަރުގެ މިލިސްޓުގައި ހިމެނޭ ޔޫޓިއުބް ޗެނަލް ތަކުގެ ތެރޭގައި، މިސްޓަރ ބީސްޓް، ޑޫޑް ޕާފެކްޓް، ރެޓް އެންޑް ލިންކް، މާކިޕްލިއަރ، ޕްރެސްޓަން އަރސްމެންޓް، އަދި 6 އަހަރުގެ އެނަސްޓޭޝިޔާގެ ނަސްޓިޔާ ޗެނަލްވެސް ހިމެނެއެވެ. މީގެ އިތުުރުން ޔޫޓިއުބުން މަޝްހޫރުވި މޭކަޕް އާޓިސްޓް، ޖެފްރީ ސްޓަރވެސް މިލިސްޓުގައި ހިމެނިގެންގޮސްފައިވެއެވެ.