ކުރީގެ ރައީސް ޢަބްދުﷲ ޔާމީން 2018 ވަނަ އަހަރުގެ ރިޔާސީ އިންތިޚާބުން ބަލިވެވަޑައިގެންނެވުމުން އޭރު ހައުސިން މިނިސްޓަރަކަށް ހުންނެވި ޑރ. މުޢިއްޒު ހިންގެވީ ހުސް ޖަރީމާ ކަމަށް ކޮމްޕިއުޓަރ ސައިންސްގެ ދާއިރާއިން މަތީ ތަޢުލީމް ޙާސިލްކުރަށްވާފައިވާ ޑރ. އިބްރާހިމް ޝިޔާމް ވިދާޅުވެއްޖެއެވެ.

މާލޭގެ ރައްޔިތުން އޭނާ އަށް އިތުބާރުކުރުމަށާއި، މާލޭގެ ރައްޔިތުން ނިކަމެތިވިޔަ ނުދޭނެ ކަމުގެ ޔަގީންކަން އަރުވާކަމަށް ޑރ. މުޢިއްޒު ވިދާޅުވުމާ ގުޅިގެން ޑރ. ޝިޔާމް ވަނީ އެކަމަށް ފާޑު ވިދާޅުވެ މުޢިއްޒުއަށް ރައްދު ދެއްވާފައެވެ. އެގޮތުން ޑރ. ޝިޔާމް ވިދާޅުވީ، ރައީސް ޔާމީން ރިޔާސީ އިންތިޚާބުން ބަލިވެ ވަޑައިގެންނެވުމުން އެދުވަހު ޑރ. މުޢިއްޒުވަނީ ސިޔާސީ ބޭނުމަށް ނިކަމެތި ރައްޔިތުމީހާ ގަނަތަޅުވާފައި ކަމަށެވެ. އަދި މިއަދުވެސް ޑރ. މުޢިއްޒު ކުރަށްވަމުން އެ ގެންދަވަނީ އެ މަސައްކަތް ކަމަށް ޑރ. ޝިޔާމް ވިދާޅުވިއެވެ.

ޑރ. ޝިޔާމް ވިދާޅުވީ، "ވޯޓުން ބަލިވުމަށްފަހު އިބޫ ހުވާކުރި ވަގުތާ ހަމަޔަށް ހައުސިންގ މިނިސްޓްރީ ދޮށުގައި އެހިންގި ޖަރީމާއަކީ އަންނަންއޮތް ސަރުކާރަށް ޖެއްސުންކުރުމަށް ގަސްތުގައި ކުރި ފެންވަރުދަށް އަމަލެއް." ކަމަށެވެ.

މާލޭގެ މޭޔަރުކަމަށް އިދިކޮޅު ކޯލިޝަންގެ ޓިކެޓްގައި ވާދަކުރަށްވާ ޑރ. މުޢިއްޒު ގެންދަވަނީ، ރައީސް ޔާމީން އާއި، ޑރ. ވަޙީދުގެ ސަރުކާރުގައި ހައުސިން މިނިސްޓަރަކަށް ހުންނަވައިގެން ނުކުރެވުނު އެތައް މަސައްކަތެއް މާލޭގެ މޭޔަރަކަށް ހޮއްވަވައިފިނަމަ ކުރަށްވާނެ ކަމަށް ވިދާޅުވަމުންނެވެ. އަދި ޑރ. މުޢިއްޒުގެ އެފަދަ ވާހަކަތަކުގެ ސަބަބުން ގިނަ ބައެއްގެ ފާޑުކިއުން ޑރ. މުޢިއްޒަށް ވަނީ އަމާޒުވެފައެވެ.

އެގޮތުން ޑރ. މުޢިއްޒު ވަނީ މިނިސްޓަރަކަށް ހުންނަވައިގެން ޙައްލު ހޯއްދަވައި ނުދެއްވުނު މާލޭ ސިޓީގެ މަގުތަކުގައި ފެންބޮޑުވުން ހައްލުކޮށް ދެއްވައި، މާލޭގެ ރައްޔިތުންނަށް ކުރިމަތިވެފައިވާ ބޯހިޔާވަހިކަމުގެ މައްސަލަ ވެސް އޭނާގެ މޭޔަރު ކަމުގައި ހައްލުކޮށްދެއްވާނެ ކަމަށް ވިދާޅުވެފައެވެ. އަދި އެއްވެސް ސިޔާސީ ފިކުރެއް ތަފާތުކުރުމެއް ނެތި ޚިދުމަތް ކުރަށްވާނެ ކަމަށްވެސް ޑރ. މުޢިއްޒު ވަނީ ވިދާޅުވެފައެވެ.