ޕާކިސްތާނުގެ ސިއްހީ ޚިދުމަތްތެރިންގެ ތެރެއިން 50 އިންސައްތަ އަށްވުރެއް ގިނަ މީހުން ޗައިނާގެ ސިނޮފާރމް ވެކްސިން ޖަހަން ދެކޮޅު ހަދައިފިއެވެ.

މިއީ ޕާކިސްތާނުގެ ހެލްތު ވޯކަރުންގެ މެދުގައި ކޮވިޑުން ރައްކާތެރިވުމަށް ވެކްސިން ޖެހުމާއި ގުޅޭގޮތުން ކުރެވުނު ސަރވޭއެއްގެ ތެރެއިން ލިބުނު މައުލޫމާތެކެވެ. މި ސަރވޭގައި ބައިވެރިވި މީހުންގެ 81 އިންސައްތަ މީހުން ވެކްސިން ޖަހަން އެއްބަސްވެފައިވެއެވެ. ނަމަވެސް މީގެ ތެރެއިން 58 އިންސައްތަ މީހުން ވަނީ ޗައިނާގެ ސިނޮފާރމް ވެކްސިން ޖެހުމާއި މެދު ދެކޮޅު ހަދާފައެވެ.

މި 58 އިންސައްތަ މީހުން ދެކޭގޮތުގައި ޗައިނާގެ ސިނޮފާރމް ވެކްސިނަކީ އަވަސް އަރުވާލައިގެން ހަދާފައިވާ ވެކްސިނެކެވެ. މިހެން ކަމުން މިވެކްސިނުގެ ރައްކާތެރި ކަމާމެދު ސުވާލު އުފެދޭކަމަށް ބުނެފައިވެއެވެ.

މީގެއިތުރުން، މިސަރވޭގައި ބައިވެރިވި މީހުންގެ ތެރެއިން 46 އިންސައްތަ މީހުން ބޭނުން ވަނީ ފައިޒާ ނުވަތަ އެސްޓްރަޒެނެކާ ވެކްސިން ކަމަށް ވެސް ބުނެފައިވެއެވެ.

ޕާކިސްތާނުގައި ކޮވިޑުން ރައްކާތެރިވުމަށް ވެކްސިން ޖަހަން ފަށާފައިވަނީ މިދިޔަ މަހުއެވެ. ވެކްސިން ދިނުމުގައި އިސްކަން ދީފައިވަނީ އިސްސަފުގައި ހަރަކާތްތެރިވާ ހެލްތު ވޯކަރުންނަށެވެ. ޕާކިސްތާނުގައި އަދި ބޭނުންކުރަމުންދަނީ ޗައިނާގެ ސިނޮފާރމް ވެކްސިން އެކަންޏެވެ.

ފާކިސްތާނުގައި ވެކްސިން ޖެހުމަށް 400،000 އަށް ވުރެއް ގިނަ ހެލްތު ވޯކަރުން ރަޖިސްޓަރ ކޮށްފައިވާއިރު، މިހާތަނަށް 200،000 އަށްވުރެއްް ގިނަ ހެލްތު ވޯކަރުންނަށް ވެކްސިން ދީފައިވެއެވެ.

ޗައިނާގެ ސިނޮފާމް ވެކްސިނަކީ ގިނަ ގައުމުތަކުން ބޭނުންކުރަމުންދާ އަދި އެކަށީގެންވާ ޔަގީންކަމެއް ދީފައިވާ ވެކްސިނެކެވެ. މިހާތަނަށް ވެކްސިން ބޭނުންކޮށްފައިވާ ގައުމުތަކުން ނެރެފައިވާ ޑޭޓާ ތަކަށް ބުރަވާއިރުވެސް ވެކްސިން ޖެހުމުން ނުބައި އަސަރުތަކެއް ނުފެންނަ ބަލިން ދިފާޢުވުމުގައި 70 އިންސައްތައަށް ވުރެ މަތިން ބައެއް ގައުމުތަކުގެ ޑޭޓާތައް ދައްކާފައިވާ ވެކްސިނެކެވެ. ބްރެޒިލްއާއި ޗިލީއާއި ތުރުކީ ވިލާތުން ވެސް ބޭނުން ކުރަނީ ޗައިނާގެ ވެކްސިނެވެ. ޗައިނާއިން ނެރެފައިވާ ދެ ވެކްސިންގެ ވެސް ތިން ވަނަ ފިޔަވަހީގެ ނަތީޖާތައް މިހާރު ވަނީ ލިބިފައެވެ.