މާލެ އަތޮޅު މާފުށި މޮނިޓަރިންގެ ހާލަތުގައި އޮތުމުން މާފުށީ ޖަލުގައި ހުންނެވި ރައީސް އަބްދުﷲ ޔާމީން ގެއަށް ބަދަލު ކޮށްދިނުމަށް އިދިކޮޅު ކޯލިޝަނުން ގޮވާލައިފިއެވެ.

އިދިކޮޅު ކޯލިޝަނުން ރޭ ނެރުނު ބަޔާނެއްގައި ބުނެފައިވަނީ ރައީސް ޔާމީންގެ ސަލާމަތާއި ރައްކާތެރިކަން ކަށަވަރު ކުރެވިފައިވާ މިންވަރު އެނގެން ނެތުމަކީ ކޯލިޝަންގެ ކަންބޮޑުވުމެއް ކަމަށެވެ. މާފުށި މޮނިޓަރިންގެ ހާލަތުގައި އޮއްވައި ރައީސް ޔާމީންގެ ލޯޔަރުންނާއި އެމަނިކުފާނާއި ބައްދަލުވުމަށް އޮތް ފުރުސަތު ވެސް ގެއްލިގެން ހިނގައިދާނެ ކަމުގެ ބިރު އޮތްކަމަށް ކޯލިޝަންގެ ބަޔާނުގައި ބުނެފައިވެއެވެ.

އެހެންކަމުން އެމަނިކުފާނު ގެއަށް ބަދަލު ކޮށްދިނުމަށާއި، މާފުށީ ޖަލުގައި ހަރުދަނާ ފިޔަވަޅުތަކެއް އެޅުމަށްވެސް އިދިކޮޅުން ނެރުނު ބަޔާނުގައި ބުނެފައި ވެއެވެ.

ކޯވިޑް-19 އާ ގުޅިގެން ސިއްހީގޮތުން ބަލަންޖެހޭ ކަންކަން ބެލުމަށް އަޅާ ފިޔަވަޅެއްގެ ގޮތުގައި މާފުއްޓަކީ މޮނިޓަރިންގެ ހާލަތުގައި އޮތް ރަށެއްކަމަށް އެޗްޕީއޭ އިން ކަނޑައަޅާފައިވީ ނަމަވެސް މޮނިޓަރިންގައި އެރަށް ބޭއްވީ ކީއްވެގެން ކަމެއް ސާފުކޮށް ނުދެވޭކަމަށްވެސް އެބަޔާނުގައި ބުނެފައި ވެއެވެ. އެކަމަކީ އެ ކޯލިޝަނުން ކަންބޮޑުވާކަމެއް ކަމަށާއި ކުއްލި ގޮތަކަށް އެރަށް މޮނިޓަރިންއަށް ގެންދިއުމަކީ ރަށު ރައްޔިތުންގެ ހިތުގައިވެސް ބިރުވެރިކަން އުފެދޭނެ ކަމެއް ކަމަށް ބަޔާނުގައި ވެއެވެ.

މިއީ ރަމަޟާން މަސް ކަމަށްވާތީ ރައީސް ޔާމީން ގެއަށް ބަދަލު ކޮށްދިނުމަށް ވެސް މީގެ ކުރިން އިދިކޮޅު ކޯލިޝަނުން ގޮވާލާފައި ވެއެވެ. މަނީލޯންޑަރިންގެ ކުށް ސާބިތުވެ ފަސް އަހަރުގެ ޖަލު ހުކުމެއް ތަންފީޒު ކުރައްވަމުން ގެންދަވާ ކުރީގެ ރައީސް ޔާމީން މިވަގުތު ހުންނެވީ މާފުށީ ޖަލުގައެވެ.