މާލެއާ ދުރުގައި ގާއިމުކޮށްފައިވާ ފެސިލިޓީތަކަށް ބިދޭސީން ބަދަލު ކުރުމުގެ މަސައްކަތް ކުރަމުން އަންނަ ކަމަށް ސަރުކާރުން ހާމަކޮށްފިއެވެ.

ނޭޝަނަލް އިމަރޖެންސީ އޮޕަރޭޝަން ސެންޓަރގައި މިއަދު ބޭއްވި ނޫސްވެރިންގެ ބައްދަލުވުމުގައި، ފަތުރުވެރިކަމާބެހޭ ވަޒީރު ޢަލީ ވަޙީދު ވިދާޅުވީ ކުރިއަށް އޮތް ހަތް ދުވަހުގެ ތެރޭގައި އިތުރު ފެސިލިޓީތައް ގާއިމުކޮށް މި ސަރަހައްދުގައި މަަސައްކަތް ކުރާ ބިދޭސީން އެހެން ތަނަކަށް ގެންދިއުމަށް މަސައްކަތް ކުރަމުން އަންނަ ކަމަށެވެ.

އެގޮތުން ހުޅުމާލެ، ގުޅީފަޅު އަދި ވިލިވަރުގައި ހިމެނޭ ފެސިލިޓީތަކަށް ބިދޭސީން ބަދަލުކޮށް އެމީހުން މާލޭގައި ދިރިއުޅޭ ހާލަތަށް ވުރެ ރަނގަޅު ހާލަތެއްގައި ދިރިއުޅެވޭނެ ގޮތް ހޯދައިދޭނެކަމަށް ޢަލީ ވަޙީދު މިއަދު ވަނީ ވިދާޅުވެފައެވެ.

ރާއްޖޭގައި ކޯވިޑް-19 ފެތުރެމުން އަންނައިރު އެންމެ ބޮޑު ކްލަސްޓާ އަކީ، ބާޒާރުމަތީގެ ފިހާރަތައް ހިމެނޭ ކްލަސްޓާއާ ގުޅިފައިވާ ކޭސްތައް ކަމަށް ޢަލީ ވަހީދު ވިދާޅުވިއެވެ.

އަދި ބާޒާރުމަތީގައި މަސައްކަތް ކުރާ ބައެއް ބިދޭސީން ނިދަނީ ކޮން ތަނެއްގައި ކަން އެމީހުން ގެންގުޅޭ ކުންފުނިތަކަށް ވެސް ނޭނގޭ ކަން ފާހަގަކުރަށްވައި ޢަލީ ވަޙީދު ވިދާޅުވީ، މާލެއިން ބޭރުގައި އިތުރު ފެސިލިޓީތައް ގާއިމުކޮށް، އެތަންތަނުގައި ތިބި މީހުން ބަދަލުކުރުމުގެ މަސައްކަތް ކުރިއަށްދާ ކަމަށެވެ.

"ބިދޭސީންނަކީވެސް އަޅުގަނޑުމެންނަށް ޚިދުމަތްކޮށްދޭ އިންސާނުން. މިޙާލަތުގައިވެސް އިންސާނީ ޤަދަރާ ކަރާމާތް ހިފެހެއްޓުމަކީ ސަރުކާރުގެ އެންމެ އިސް ވާޖިބް." ޢަލީ ވަޙީދު ވިދާޅުވިއެވެ.

މީގެ ކުރިން ސަރުކާރުން ވަނީ އެއްތަނަކަށް ޖަމާވެ ދިރިއުޅެމުން ދިޔަ ބިދޭސީން ހުޅުމާލެއަށް ބަދަލު ކުރުމުގެ މަސައްކަތް ތަކެއްވެސް ކޮށްފައެވެ. ނަމަވެސް މިގޮތުން ބަދަލުކުރި މީހުންގެ ތެރެއިން މީހަކު ކޯވިޑް-19 އަށް ޕޮޒިޓިވް ވުމާއި ގުޅިގެން ސަރުކާރުން ވަނީ އެ މަސައްކަތް މެދުކަނޑާލާފައެވެ.

ފުލުހުން ބުނެފައިވަނީ މާލޭގައި ބިދޭސީން ދިރިއުޅޭ 18 ތަނެއް ބަލަހައްޓަމުން އަންނަ ކަމަށާއި، އެތަނުގައި 830 އަށްވުރެ ގިނަ މީހުން ދިރިއުޅެމުންދާ ކަމަށެވެ.