ކޮވިޑުން ރައްކާތެރިވުމަށް އެސްޓްރަރޒެނެކާއިން ތައްޔާރުކޮށްފައިވާ ވެކްސިން ބޭނުން ކުރުމުން ލޭގަނޑުވާކަމަށް ބުނެ ޔޫރަޕުގެ ބައެއް ގައުމުތަކުގައި އެސްޓްރަރޒެނެކާގެ ކޮވިޑް ވެކްސިން ބޭނުން ކުރުން ހުއްޓާލައިފައި ވީނަމަވެސް، ލޭ ގަނޑުވުމާއި ވެކްސިނާއި ގުޅުމެއް ނެތްކަމަށް އެސްޓްރަރޒެނެކާ ކުންފުނިން ހާމަކޮށްފިއެވެ.

ވެކްސިން ބޭނުން ކުރުމުން ލޭގަނޑުވާކަމަށް ބުނުމުން، އެސްޓްރަރޒެނެކާއިން ވަނީ އެކުންފުނީގެ ކޮވިޑް ވެކްސިން ރިވިއުކޮށްފައެވެ. އަދި މިރިވިއުގައި، މިވެކްސިން ޖެހި 17 މިލިިއަން މީހެއްގެ ޑާޓާ ބޭނުންކޮށްފައިވާނެކަމަށް އެކުންފުނިން ހާމަކޮށްފައިވެއެވެ.

މިރިވިއުގައި، ޔޫރަޕުގައިވެސް، އިނގިރޭސިވިލާތުގައިވެސް މިވެކްސިން ޖެހި އެއްވެސް ބަޔަކު، ވެކްސިން ޖަހައިގެން ލޭގަނޑުވެ ނުރައްކާތެރި ހާލަތަކަށް ގޮސްފައިނުވާ ކަމަށްވެސް އެސްޓަރަރޒެނެކާއިން ބުނެފައިވެއެވެ. އަދި ވެކްސިނުގެ އެއްވެސް ބެޗެއްގައިވެސް ނުރައްކަލަކަށް ހުށައެޅޭނެ ފަދަ މާއްދާތަކެއް އެކުލެވިގެން ނުވާކަމަށާއި، ވެކްސިނުގެ އެއްބެޗާއި އަނެއްބެޗުގައި އެއްވެސް ތަފާތު ކަމެއް ނުހުންނާނެކަމަށްވެސް އެފަރާތުން ބުނެފައި ވެއެވެ.

އެސްޓްރަޒެނެކާގެ ރިވިއުއާއެކު، ޔޫރަޕިއަން ޔޫނިއަން އަދި ޑަބްލިއު އެޗްއޯއިން ވަނީ ހަމަ ކުރިއެކޭވެސް އެއްފަދައިން އެސްޓްރަރޒެނެކާގެ ކޮވިޑް ވެކްސިނަކީ ރައްކާތެރި ވެކްސިނެއްކަމަށް ބުނެފައެވެ.

އެސްޓްރަރޒެނެކާގެ ކޮވިޑު ވެކްސިނުގެ ރިވިއު އާންމުކޮށްފައިވަނީ މިދިޔަ އާއްދީތަ ދުވަހުއެވެ.