މާލޭގެ ރީޓެއިލް ވިޔަފާރިތަކަށް މުދާ ލިބުމުގައި ހުރި ދަތިތައް ނައްތާލައި ވިޔަފާރިވެރިންނަށް ފަސޭހަކޮށްދިނުމުގެ މަސައްކަތް ސިޓީކައުންސިލުން ފަށައިފިއެވެ.

މާލޭ ސިޓީ ކައުންސިލުން ކުރި ޓުވީޓެއްގައި ބުނީ މާލޭގެ ރީޓެއިލް ފިހާރަތަކުގައި ސްޓޮކް ހުރިނެތްގޮތް ސާފުކުރުމަށް އެކައުންސިލުން މައުލޫމާތު އެއްކުރަމުން އަންނަ ކަމަށެވެ.

އެގޮތުން ކާޑުގެ ބާވަތްތަކާއި ތަރުކާރީއާއި މޭވާ ހޯދަން ދަތިވާ ފަރާތްތަކުން އެތަކެތި ބޭނުންވާ މިންވަރާއެކު 9955788 ނަންބަރަށް މެސެޖު ކުރުމަށް ސިޓީ ކައުންސިލުން އެދިފައިވެއެވެ.

މެސެޖުކުރާއިރު، އެ ފިހާރައެއްގެ ނަމާއި، ގުޅޭނެ މޯބައިލް ނަންބަރާއި އޮޕަރޭޓަރުގެ މައުލޫމާތު ހިމެނުމަށްވެސް ވަނީ އެދިފައެވެ.

ކޯވިޑް-19 އާ ގުޅިގެން މާލެ ލޮކްޑައުންކުރުމާއެކު ސިޓީ ކައުންސިލުން އަންނަނީ ވިޔަފާރިތަކަށް މުދާ ހޯދުމުގައި ފަސޭހަކޮށްދިނުމަށް ގިނަ މަސައްކަތްތަކެއް ކުރަމުންނެވެ.

މިހާތަނަށް ރާއްޖެއިން 228 މީހުން ކޯވިޑް-19 އަށް ޕޮޒިޓިވް ވެފައިވާއިރު، މާލޭގައި މިބަލި ވަނީ ކޮމިއުނިޓީ ސްޕްރެޑަކަށް ގޮސްފައެވެ.