އިންޑިއާގައި ކޮވިޑުގެ ދެވަނަ ރާޅާއެކު ބަލި ޖެހި ހާލުބޮޑުވާ މީހުން ގިނަވެ، އިންޑިއާގެ އެކި ސްޓޭޓްތަކުގެ ހޮސްޕިޓަލްތައް އޮކްސިޖަނަށް ޖެހިއްޖެއެވެ.

މިކަމާބެހޭގޮތުން އިންޑިޔާގެ ދިއްލީ ސިޓީގެ ޗީފް މިނިސްޓަރ އަރްވިންދް ކެޖްރިވަލް ވަނީ މިފަހަކުން ދިއްލީގެ ހޮސްޕިޓަލްތައްވެސް އޮކްސިޖަނަށް ޖެހެން ފަށައިފި ކަމަށް ވިދާޅުވެފައެވެ.

"ކޮވިޑް ކޭސްތައް ގިނަވުމާއިއެކު އާންމުކޮށް ސަޕްލައި ކުރެވޭ އޮކްސިޖަންގެ މިންވަރު އިތުރު ކުރަން ޖެހިފައިވޭ. ނަމަވެސް އެހެން ސްޓޭޓްތައް އޮކްސިޖަނަށް ޖެހުމާއިއެކު ދިއްލީއަށް އޮކްސިޖަން ސަޕްލައި ކުރެވޭ މިންވަރު އިތުރުކުރުމުގެ ބަދަލުގައި އާންމުކޮށް ސަޕްލައި ކުރެވޭ އޮކްސިޖަންގެ މިންވަރު ވަނީ މާބޮޑަށްވެސް ދަށްކުރެވިފައި." ދިއްލީ ސިޓީގެ ޗީފް މިނިސްޓަރ އަރްވިންދް ކެޖްރިވަލް ވިދާޅުވިއެވެ.

މީގެއިތުރުން ކޮވިޑާއި ގުޅިގެން ދިއްލީގެ ހާލަތު ގޯސްވެ ބަލިމީހުންނަށް ބޭނުންވާ އޮކްސިޖަންގެ އިތުރުން، ބަލިމީހުން އެޑްމިޓް ކުރާނެ އެނދު މަދުވަމުންދާކަން ފާހަގަކޮށް އިންޑިޔާގެ ބޮޑުވަޒީރުގެ އިތުރުން ސަރުކާރުގެ އެކި މިނިސްޓަރުންގެ ސަމާލުކަމަށް އަރްވިންދް ކެޖްރިވަލް ވަނީ އެމައްސަލަ ގެނަސްފައެވެ.

ދިއްލީގެ އިތުރުން އިންޑިޔާގެ އެކި ސިޓީ ތަކާއި ސްޓޭޓްތަކުގެ ހޮސްޕިޓަލްތައް އޮކްސިޖަނަށް ޖެހި ޝަކުވާ ހުށަހަޅަމުންދާކަމަށް އިންޑިޔާގެ ސަރުކާރުން ވަނީ ހާމަކޮށްފައެވެ. މިކަމާބެހޭގޮތުން އިންޑިޔާގެ ކޮމާސް މިނިސްޓަރ ޕިޔުޝް ގޮޔާލް ވަނީ އޮކްސިޖަންގެ ޑިމާންޑް ކޮންޓްރޯލް ކުރުމަށް ސްޓޭޓްތަކަށް ގޮވާލާފައެވެ.

އިންޑިޔާގައި ކޮވިޑް ކޭސްތައް އިތުރުވެ ދުނިޔޭގެ އެންމެ ގިނަބަޔަކު މިބައްޔަށް ޕޮޒިޓިވްވި ގައުގެ ލިސްޓުގެ ދެވަނަ އަށް މިހާރު ވަނީ އަރާފައެވެ. މިގޮތުން މިލިސްޓުގައި އެއްވަނައިގައި 31.7 މިލިއަަނަށްވުރެ ގިނަ ކޮވިޑް ކޭސް އާއެކު އެމެރިކާ އޮތްއިރު، 14.8 މިލިއަަނަށްވުރެ ގިނަ ކޮވިޑް ކޭސް އާއެކު ދެވަނައިގައި އޮތީ އިންޑިއާއެވެ.