ވަކި ކަހަލަ ވަޒީފާއެއް އަދާކުރުމަށް ދިވެހިން ފަސްނުޖެހުމަށް ފަތުރުވެރިކަމާ ބެހޭ ވަޒީރު ޢަލީ ވަޙީދު ގޮވާލައްވައިފިއެވެ.

މަސައްކަތްތެރިންގެ ދުވަހުގެ މުނާސަބަތުގައި ކުރެއްވި ޓްވީޓެއްގައި މިނިސްޓަރ ޢަލީ ވަޙީދު ވިދާޅުވެފައިވަނީ، ރާއްޖޭގެ ވަޒީފާގެ މާޙައުލުގައި ދިވެހިންނަށް އިސްކަންދޭން ޖެހޭ ކަމަށެވެ.

އަދި ވަކި ކަހަލަ ވަޒީފާ ތަކަކީ ދިވެހިންނޫން ބަޔަކަށް އަދާނުކުރެވޭނެ ވަޒީފާތަކެއްގެ ގޮތުގައި ކަނޑައަޅައި، ބައެއް ވަޒީފާތައް ދިވެހިންނަށް ޚާއްސަ ކުރަން ޖެހޭ ކަމަށް ޢަލީ ވަޙީދު ވަނީ ވިދާޅުވެފައެވެ.

މީގެ އިތުރުން ވަޒީފާގެ މާހައުލަށް އިސްލާޙީ ހެޔޮ ބަދަލުތަކެއް އެންމެން ގުޅިގެން ގެނައުމަކީ ވަރަށް މުހިއްމު ކަމެއް ކަމަށް މިނިސްޓަރ ވަނީ ވިދާޅުވެފައެވެ،

ފަތުރުވެރިކަމާ ބެހޭ ވަޒީރު މިފަދަ މޭރުމަކުން ޓްވީޓް ކުރައްވާފައި ވާއިރު ކޯވިޑް-19 އާ ގުޅިގެން ރާއްޖޭގެ ރިސޯޓްތައް ބަންދުކޮށް ބައެއް މުވައްޒަފުން ވަޒީފާއިން ވަކިކުރުމާއި، މުސާރަ ކުޑަކުރުމާއި، ނޯޕޭ އަށް ފޮނުވާލުންފަދަ ގިނަ މައްސަލަތަކެއް ވަނީ ފެންމަތިވެފައެވެ.

އަދި މި ކަމުގައި ފަތުރުވެރިކަމާ ބެހޭ ވުޒާރާއިން އެ ދާއިރާގެ މަސައްކަތްތެރިންގެ ޙައްޤުތަކަށްވުރެ ވިޔަފާރިވެރިންގެ މަސްލަޙަތު ޙިމާޔަތްކުރާކަމުގެ ޝަކުވާގެ އަޑުވަނީ ގަދަވާން ފަށާފައެވެ.

ރައީސް ޔާމީންގެ ވެރިކަމުގައި 2015 ވަނަ އަހަރު މާލޭގައި ބޭއްވި މޭޑޭ ބޮޑު މުޒާހަރާއަށް ފަހު، ހައްޔަރުކޮށް ދޫކޮށްލުމުން ފިއްލަވައިގެން އަލީ ވަހީދު އުޅުއްވީ އިނގިރޭސި ވިލާތުގައެވެ. އަލީ ވަޙީދު އެނބުރި ރާއްޖެ ވަޑައިގެންނެވީ ރައީސް އިބްރާހިމް މުޙައްމަދު ޞާލިޙަށް 2018 ވަނަ އަހަރުގެ ރިޔާސީ އިންތިޚާބު ކާމިޔާބުވުމަށް ފަހުއެވެ.