ރާއްޖޭގައި ކޯވިޑް-19 ކޮންޓްރޯލް ކުރުމަށް އޮތް އެންމެ ބޮޑު އެއް ގޮންޖެހުމަކީ ރާއްޖޭގައި ޒަމާނުއްސުރެ ހައްލުނުވެ އޮތް ބިދޭސީންގެ މައްސަލަކަމަށް ދާޚިލީ ވަޒީރު އިމްރާން އަބްދުﷲ ވިދާޅުވެއްޖެއެވެ.

އިމްރާން ކުރެއްވި ޓްވީޓެއްގައި ވިދާޅުވީ ބިދޭސީން ދިރިއުޅޭ ދަތި ތަންތަނުން ނެރެ ރައްކާތެރި ތަންތަނަށް ގެންދިއުމަކީ ސަރުކާރަށް ބުރަ ބޮޑު މަސައްކަތެއް ކަމަށެވެ. ނަމަވެސް ހާއްސަ އިސްކަމެއްދީގެން އެކަން ކުރަމުން އަންނަ ކަމުގައި ވަޒީރު ވިދާޅުވިއެވެ.

މާލެ، ހުޅުމާލެ އަދި ވިލިމާލެ ހިމެނޭގޮތުން މާލޭ ސަރަހައްދުގައި ވަޒީފާއަދާކުރާ ވަކި ތަނެއް ނެތި ނުވަތަ ދިރިއުޅޭނެ ވަކި ތަނެއް ކަނޑައެޅިފައި ނުވާ ބިދޭސީ މަސައްކަތްތެރިން ، އެކަހެރިކޮށް އެމީހުން މޮނީޓާކުރުމަށް އިތުރު ފިޔަވަޅުތަކެއް ނާޅާއިފިނަމަ އެމީހުންގެ މެދުގައި ބަލި ފެތުރުމުގެ ފުރުސަތު ބޮޑުކަމަށް ފެނިވަޑައިގަންނަވާތީ އެފަދަ މީހުން، އެންއީއޯސީން ކަނޑައަޅާ ވަކި ތަނެއްގައި ކަރަންޓީނު ކުރުމަށް ޑިރެކްޓަރ ޖެނެރަލް އޮފް ޕަބްލިކް ހެލްތު ވަނީ އަނަގަވާފައެވެ.

ޓޫރިޒަމް މިނިސްޓަރ މިއަދު ކުރެއްވި ޓްވީޓެއްގައި ވިދާޅުވެފައިވަނީ ބިދޭސީން މާލެއިން ބޭރަށް ގެންދިއުމުގެ މަސައްކަތް މިރޭ ފައްޓަވާނެ ކަމަށެވެ.

ރާއްޖެއިން ކޯވިޑް-19 އަށް ޕޮޒިޓިވްވީ މީހުންގެ ތެރޭގައި އެންމެ ގިނައީ ބަނގްލަދޭޝް ރައްޔިތުންނެވެ. އެޤައުމުގެ 261 މީހަކަށް ރާއްޖެއިން ބަލި ޖެހިފައިވާއިރު، ބައްޔަށް ޕޮޒިޓިވް ވެފައިވާ ދިވެހިންގެ ޢަދަދަކީ 157 އެވެ.