ކޮންމެ އަންހެނަކަށްވެސް އެއްފަހަރާ ހަތަރު ފިރިހެނުންނާ އިނުން ހުއްދަ ކުރާ ގަވާއިދެއް ދެކުނު އެފްރިކާގެ ސަރުކާރުން ހުށައަޅައިފިއެވެ.

މިފަދަ ގަވާއިދެއް ހުށައެޅުމުން، ދެކުނު އެފްރިކާގެ ގިނަ ބަޔަކު މިކަމާ ދެކޮޅު ހަދަމުން ދާއިރު، މިފަދަ ބަދަލަކަށް އެފްރިކާއިން ދުވަހަކުވެސް ތައްޔާރު ނުވާނޭކަމަށް ބައެއް ފަރާތްތަކުން ފާހަގަ ކުރެއެވެ. މިގޮތުން މިކަމާ ބެހޭގޮތުން ދެކުނު އެފްރިކާއަށް ނިސްބަތްވާ ޕްރޮފެސަރ ކޮލިސް މަޗޮކޯ ވިދާޅުވެފައިވަނީ އަންހެނުންނާއި ފިރިހެނުންނަށް ހަމަހަމަކަން ލިބުމަށް އެފްރިކާ ބައްރު ތައްޔާރު ނުވާ ކަމަށާއި، ހާއްސަ ގޮތެއްގައި ފިރިހެނުންގެ އަތްދަށުން ކޮންޓްރޯލް ނުވާ އަންހެނުން ގޮވައިގެން ދިރިއުޅެންވެސް އެފްރިކާ ތައްޔާރު ނުވާ ކަމަށެވެ.

މިގަވާއިދާ ދެކޮޅު ގިނަބަޔަކު ފާހަގަކުރާގޮތުންނަމަ، މިހާރުވެސް ދެކުނު އެފްރިކާގެ ގާނޫނުލް އުގޫބާތުގައި އެމީހަކު ބޭނުން މީހަކާ އެކު އުޅުމުގެ މިނިވަންކަން އޮތްއިރު މިފަދަ ހަރުކަށި ގަވާއިދަކުން ހަމަނުޖެހުންތައް އިތުރުވެ އެފްރިކާގައި ފިރިހެނުންގެ ބާރުވެރިކަން ކެނޑިގެންދާނެއެވެ.

ދެކުނު އެފްރިކާގެ ގާނޫނުގައި ބުނާ ގޮތުންނަމަ، އެމީހަކު ބޭނުން ޖިންސެއްގެ މީހަކާ ކައިވެނި ކުރުމުގެ މިނިވަންކަން ކޮންމެ މީހަކަށްވެސް ލިބިގެންދެއެވެ. އަދި ކޮންމެ ފިރިހެނަކަށް ހަތަރު އަނބިން ގެންގުޅުމުގެ މިނިވަންކަންވެސް ލިބިދީފައި ވެއެވެ.

ގާނޫނަކުން ހުއްދަ ނުކުރިނަމަވެސް، އަންހެނުން އެކަކަށް ވުރެ ގިނަ ފިރިހެނުންނާ އިނދެގެން އުޅުމަކީ މަދުންނަމަވެސް ދެކުނު އެފްރިކާގައި ފެންނަކަމެކެވެ. އަދި މިފަދަ ކައިވެނި ތަކަކީ ގާނޫނީ ގޮތުން މާބޮޑު ބާރެއް ނުވަތަ ގަބޫލު ކުރުމެއްވެސް ލިބިފައިނުވާ ކައިވެނި ތަކަކަށް ވުމުން، އަންހެނުން އެކަކަށް ވުރެ ގިނަ ފިރިހެނުންނާ އިނދެގެން އުޅުމަކީ ސިއްރުކުރެވިފައިވާ ކައިވެނިތަކެކެވެ.