ދައުލަތުގެ މުދާ ރަހުނުކޮށްގެން ދަރަނި ނެގުމުގެ ވިސްނުންފުޅު ފިނޭންސް މިނިސްޓަރު އިބްރާހިމް އަމީރު ނުގެންގުޅުއްވާ ކަމަށް ފިނޭންސް މިނިސްޓްރީ އިން ބުނެފިއެވެ.

ފިނޭންސް މިނިސްޓްރީން މިހެން ބުނީ، ދައުލަތުގެ ބައެއް ބިންތައް ރަހުނުކުރުމަށްފަހު ސުކޫކެއް ވިއްކުމުގެ މަސައްކަތަށް ފިނޭންސް މިނިސްޓަރު އިބްރާހިމް އަމީރާއި މިނިސްޓްރީގެ ބައެއް މުވައްޒަފުން ދުބާއީއަށް ފުރާފައިވާ ކަމަށް ބައެއް މީޑިޔާތަކުން ރިޕޯޓްކުރުމާއި ގުޅިގެންނެވެ. ފިނޭންސް މިނިސްޓްރީން ބުނީ އެ ‎ދަތުރުގެ މައިގަނޑު ބޭނުމަކީ މެދު އިރުމަތީގެ އިންވެސްޓަރުންނާއި އޮންނަ ގުޅުން ބަދަހިކުރުމާއި އިގްތިސާދީ ގޮތުން ރާއްޖެއަށް ލިބިފައިވާ ކުރިއެރުމުގެ ވާހަކަ ހިއްސާކުރުން ކަމަށެވެ.

Minister of Finance will be travelling to UAE between 5-10th August on an official trip to meet with development partners, banks and investors. pic.twitter.com/2CUSTWvGbv

— Ministry of Finance (@MoFmv) August 5, 2021

އަދި މިހާ ތަނަށް ދައުލަތުން މުދަލެއް ރަހުނުކޮށްގެން ދަރަންޏެއް ނަގާފައި ނުވާނެ ކަމަށް ފިނޭންސް މިނިސްޓްރީން ވަނީ ބުނެފައެވެ.

"ކުރިޔަށްއޮތް ތަނުގައިވެސް ދައުލަތުގެ މުދަލެއް ރަހުނުކޮށްގެން ދަރަންޏެއް ނެގުމަށް މިނިސްޓަރ އަމީރު ވިސްނުންފުޅެއް ނުގެންގުޅުއްވައެވެ." ފިނޭންސް މިނިސްޓްރީން ބުންޏެވެ.

ދައުލަތުގެ މުދަލެއް ރަހުނުކޮށްގެން ލޯނެއް ނަގާފައިނުވާނެ ކަމަށް ފިނޭންސް މިނިސްޓްރީން ބުނި ނަމަވެސް ކުރީގެ ރައީސް އަބުދު ﷲ ޔާމިންގެ ވެރިކަމުގައި އިމާރަތްކޮށްފައިވާ ދަރުމަވަންތަ ހޮސްޕިޓަލު ރަހުނުކޮށްގެން 300 މިލިއަން ޑޮލަރުގެ ސުކޫކެއް ވަނީ ވިއްކާފައެެވެ. ދަރުމަވަންތަ އިމާރާތް ރަހުނުކޮށް ވިއްކި ސުކޫކުން މީގެ ކުރިން ވަނީ 200 މިލިއަން ޑޮލަރު (3.1 ބިލިއަން ރުފިޔާ) އާއި 100 މިލިއަން ޑޮލަރު (1.5 ބިލިއަން ރުފިޔާ) ސަރުކާރުން ހޯދާފައެވެ.