އެމަނިކުފާނު މިހާރު ހުންނެވީ ރައްޔިތުންގެ މަޖިލީހުގެ މެޖޯރިޓީއާ އެކުގައި ކަމަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙް ވިދާޅުވެއްޖެއެވެ.

ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙް ވިދާޅުވީ ވެރިކަމުގައި ހުންނަ ފަރާތަކަށް މަޖިލީހުގެ މެޖޯރިޓީ ވަރަށް މުހިއްމު ކަމަށާއި، މެޖޯރިޓީ ނެތި ވެރިކަން ކުރުމަކީ އުދަނގޫ ކަމެއް ކަމަށެވެ. އަދި 2008 ވަނަ އަހަރުން ފެށިގެން ރާއްޖެއިން ފެނިގެން ގޮސްފައިވަނީ މަޖިލީހުގެ މެޖޯރިޓީ ނެތި ވެރިކަން ކުރުމުން ދިމާވި މައްސަލަތައް ކަމަށް ރައީސް ވިދާޅުވިއެވެ.

ރައީސް ވިދާޅުވީ އެމްޑީޕީގެ މެޖޯރިޓީ އޮވެ، ވެރިކަން ކުރަން ފުރުސަތު ލިބިފައިވުމުން، މަޖިލީހުގެ މެޖޯރިޓީ ދޫކުރައްވަން ބޭނުން ނުވާކަމަށެވެ. އަދި ރައްޔިތުންނަށް ބޭނުންވާ ހިދުމަތްތައް ފޯރުކޮށްދިނުމަށްޓަކާާ މެޖޯރިޓީ ވަރަށް މުހިންމު ދައުރެއް އަދާކުރާކަމަށެވެ.

ރައީސް މިއަދު ވިދާޅުވީ، އެމަނިކުފާނުގެ އަތްޕުޅުގައި މަޖިލީހުގެ މެޖޯރިޓީ އެބަ އޮތްކަމަށެވެ.

އޭގެ އިތުރުން ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދާއި ސިޔާސީ ގޮތުން އަބަދުވެސް ޚިޔާލު ތަފާތުވާކަމަށާއި، ޚާއްސަކޮށް ރައީސް ނަޝީދު ވެރިކަމުގައި ހުންނެވިއިރުވެސް ނިންމަވާ ބައެއް ނިންމުންތަކުގައި ދެބޭފުޅުންގެ ޚިޔާލު ތަފާތުކަމަށެވެ.

އެހެން ނަމަވެސް ވެރިކަމުގައި ހުންނަ މީހަކު ކަންކަން ނިންމުމުގައި ވަށައިގެންހުރި ގިނަ ކަންތައްތަކަކަށް ބަލަންޖެހޭ ކަމަށާއި އެއީ މައްސަލައެއް ނޫން ކަމަށް ރައީސް މިއަދު ވިދާޅުވިއެވެ.