އެމަނިކުފާނު ކޮމްޕްރޮމައިޒްވާ ބާވަތުގެ އެއްވެސް އެއްޗެއް އެއްވެސް މީހެއްގެ އަތުގައި ނޯންނާނެ ކަމަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙް ވިދާޅުވެއްޖެއެވެ.

ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން ރައީސް އިބްރާހިމް މުހަންމަދު ސާލިހު ވިދާޅުވީ، އެމަނިކުފާނު ކޮމްޕްރޮމައިސް ވާވަރުގެ އެއްޗެއް އެއްވެސް މީހެއްގެ އަތުގައި ނުހުންނާނެ ކަމަށެވެ.

"އަޅުގަނޑު ކޮމްޕޮރޮމައިޒް ވާވަރުގެ އެއްވެސް ލިޔުމެއް އެއްވެސް އެއްޗެއް ބޭފުޅެއްގެ އަތުގައެއް ނޯންނާނެ ހާމަކުރައްވަންވީ، އެއީ ޔަގީން ކަމެއް." ކުރީގެ ޓޫރިޒަމް މިނިސްޓަރު އަލީ ވަހީދު ރާއްޖެ ފުރުވާލީ އެމަނިކުފާނު ކޮމްޕްރޮމައިޒް ވާވަރުގެ އެއްޗެހި ތަކެއް ހުރެގެން ކަމަށް ކުރީގެ ހޯމް މިނިސްޓަރު އުމަރު ނަސީރު ކުރެއްވި ތުހުމަތު ދޮގުކުރައްވަމުން ރައީސް ސާލިހު ވިދާޅުވިއެވެ.

މީގެ އިތުރުން ރައީސް ސާލިހު ވިދާޅުވީ، ކުރީގެ ޓޫރިޒަމް މިނިސްޓަރު އަލީ ވަހީދުގެ ޖިންސީ ގޯނާގެ މައްސަލައިގައި ވަގުތުން ފިޔަވަޅު އަޅުއްވައި އޭނާ މަގާމުން ވަކިކުރެއްވި ކަމަށެވެ. އަލީ ވަހީދުގެ މައްސަލަ މިހާރު އޮތީ ޝަރުއީ މަރުހަލާގައި ކަމަށާއި، އެމައްސަލައަށް ނުފޫޒު ނުފޯރުއްވާނެ ކަމަށް ރައީސް ސާލިހު ވިދާޅުވިއެވެ.

"އަލީ ވަހީދުގެ މައްސަލަ މިހާރު އެވަނީ ކޯޓު މަރުހަލާގައި ދެން އެމައްސަލަ ކުރިއަށް ގެންދަންޖެހޭނީ ކޯޓު މަރުހަލާގައި އެކަމުގެ ހިންގުމުގެ ތެރެއަށް އަޅުގަނޑުމެން ނުވަންނާނަން، ވަދެވޭކަން ނުވެސް އޮންނާނެ. މިނިވަންކަމާއެކު ޝަރީއަތްތައް ހިންގުމަށް ޖާގަ ދޭންޖެހޭނެ. އެހެންނަމަވެސް އެކަން ފުރިހަމަ އަށް ކުރުމަށްޓަކައި ދައުލަތުގެ އެންމެ މަތީ ވެރިޔާގެ ހައިސިއްޔަތުން އަޅުގަނޑު ކޮށްދޭންޖެހޭ ކަންތައްތައް ފޯރުކޮށްދޭންޖެހޭ އެހީތެރިކަން އަޅުގަނޑު ފޯރުކޮށްދޭނަން." ރައީސް ސާލިހު ވިދާޅުވިއެވެ.