އިންސާނީ ވަގުފާރި އާއި، ފަތުރުވެރިކަން މުޅިން ތަފާތުވާނެ ކަމަށް ފަތުރުވެރިކަމާބެހޭ ވަޒީރު ޑރ. އަބްދުﷲ މައުސޫމް ވިދާޅުވެއްޖެއެވެ.

ޑރ. މައުސޫމް މިމޭރުމުން ވިދާޅުވެފައިވަނީ، އޮޅުވާލައިގެން ރާއްޖެ ގެނެސް މަގުމައްޗަށް ފަތުރުވެރިންތަކެއް ދޫކޮށްލި މައްސަލައެއް ރޭ ދަންވަރު މީޑިއާގެ ސަމާލުކަމަށް އައުމާ ގުޅިގެންނެވެ. ރާއްޖޭގެ ބަޔަކާއި، ބިދޭސީ ބަޔަކު ގުޅިގެން ރާއްޖޭގެ ރަށެއްގެ ގެސްޓްހައުސްއަކަށް ގެނައި ފަތުރުވެރިންތަކެއް މަގުމަތިވެފައިވަނިކޮށް ސަރުކާރުން މިހާރު އެމީހުންނަށް ވަގުތީ ޙައްލެއް ހޯދައިދީފައިވާ ކަމަށް މަޢުލޫމާތު ލިބިފައިވެއެވެ.

ރޭގެ ޙާދިސާއަކީ ހިއުމަން ޓްރެފިކިންގގެ ޢަމަލެއްކަމަށް ސިފަކުރަށްވަމުން ޑރ. މައުސޫމް ވިދާޅުވީ، ހިއުމަން ޓްރެފިކިންގ އާ ފަތުރުވެރިކަމަކި ވަރަށް ތަފާތު ދެކަނެއް ކަމަށެވެ. އެގޮތުން ހުއްދަނެތި ތަންތަނުގައި ފަތުރުވެރިން ބޭތިއްބުމަކީ ޓޫރިޒަމް ނޫން ކަމަށާއި، އެއީ އިންސާނީ ވަގުފާރި (ހިއުމަން ޓްރެފިކިންގ) ކަމަށް މިނިސްޓަރ މައުސޫމް ވިދާޅުވިއެވެ.

"ކަމާގުޅޭ އިދާރާތަކުން އެފަދަކަންތައްތައް ބަލާ ފިޔަވަޅު އަޅުއްވާނެކަމުގެ ހަބަރު ލިބުމުން ކުޑަކޮށް ހިތްހަމަޖެހިއްޖެ." މިނިސްޓަރ މައުސޫމް ވިދާޅުވިއެވެ.

ހިއުމަން ޓްރެފިކިނގް އާ ޓޫރިޒަމާ ވަރަށް ތަފާތު.
ތަންތަނުގައި ޓޫރިސްޓުން ހުއްދަނެތި ބޭތިއްބުން އެއީ ޓޫރިޒަމެއްނޫން، އެއީ އިންސާނީ ވަގުފާރި (ހިއުމަން ޓްރެފިކިންގް).
ކަމާގުޅޭ އިދާރާތަކުން އެފަދަކަންތައްތައް ބަލާ ފިއަވަޅު އަޅުއްވާނެކަމުގެ ހަބަރު ލިބުމުން ކުޑަކޮން ހިތްހަމަޖެހިއްޖެ.

— Abdulla Mausoom (@Mausoom_Maus) August 15, 2021

ރޭގެ ވަގުތެއްގައި މާލޭގެ މަގުމައްޗަށް ދޫކޮށްލި 27 ފަތުރުވެރިންގެ ތެރޭގައި 13 ކުޑަކުދިން ހިމެނެއެވެ. އެމީހުން މަގުމަތީގައި ތިބީ ރާއްޖެ އައިއިރު ގެނައި ފޮށިތަންމައްޗާވެސް އެއްކޮށެވެ.

އެ މައްސަލަ ޙައްލު ކުރެއްވުމަށް ފުލުހުންނާއި، އިމިގްރޭޝަން ކޮންޓްރޯލަރ ޙަނަފީއާއި، ޔޫތު މިނިސްޓަރު އަހްމަދު މަހްލޫފް އެ ސަރަޙައްދުގައި ޙަރަކާތްތެރިވެ ވަޑައިގެންނެވިއެވެ.