އެމްޑީޕީ އޮފީސްތެރޭގައި މާރާމާރީ ހިންގައި މަރިޔަމް ޒުބައިރު (މަންދީ) ގެ ބޯ ފަޅާލިކަމުގެ ތުހުމަތުގައި އެ އޮފީހުގައި މަސައްކަތްކުރާ އަޙްމަދު ޖަޒީލް ހައްޔަރު ކޮށްފިއެވެ.

އިއްޔެ ހިންގި އެ މާރާމާރީގައި ޒަހަމް ވެފައިވަނީ އެމްޑީޕީގެ އިދާރީ މުވައްޒަފެއް ކަމަށްވާ މަރިޔަމް ޒުބައިރު (މަންދީ) އެވެ. މަންދީ އަކީ ގަލޮޅު ދެކުނު ދާއިރާގެ މެމްބަރު މީކާއިލް ނަސީމްގެ މަންމަ އެވެ.

ޖަޒީލް ހައްޔަރުކޮށްފައިވަނީ ކޯޓު އަމުރެއްގެ ދަށުން މިއަދުގެ ވަގުތެއްގައެވެ. ޙަމަލާ އާ ގުޅިގެން މަންދީއަށް ވަނީ އޭޑީކޭގައި ފަރުވާ ދީފައެވެ.

ޙަމަލާއާ ގުޅިގެން އޮންލައިން ފޯރަމެއްގައި ރޭ މަންދީ ބުނެފައިވަނީ، ޖަޒީލް އޭނާއަށް ޙަމަލާދީފައިވަނީ، ބައިސްކަލްގެ ފުރޮޅު ލޮކްކުރަން ގެންގުޅޭ ދަގަނޑު ލޮކަކުން ކަމަށެވެ. ބައެއް މީޑިއާތަކަށް މަޢުލޫމާތު ދެމުން ޖަޒީލް ބުނެފައިވަނީ އޭނާ އެ ޢަމަލު ހިންގާފައިވަނީ އޭނާއަށް ކުރަމުންދިޔަ ފުރައްސާރައަށް ކެތް ނުކުރެވިގެން ކަމަށެވެ.

ފުލުހުން މިހާރު ދަނީ މި މައްސަލަ އިތުރަށް ތަޙުޤީޤު ކުރަމުންނެވެ.