އެމްޑީޕީގެ އެތެރޭގައި ހިޔާލު ތަފާތުވުންތައް އެބަހުރި ކަމަށާއި، އެހެންނަމަވެސް މަންޒަރު ކިލަނބުވާފަދަ ކަމެއް ނުކުރައްވާނެ ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިޙް ވިދާޅުވެއްޖެއެވެ.

ރައީސް ޞާލިޙް މި މޭރުމުން ވިދާޅުވީ، ށ. ފުނަދޫ އެމްޑީޕީގެ އިސްސަފުގައި ޙަރަކާތްތެރިވާ މެންބަރުންނާ ބައްދަލުކުރައްވައި ދެއްކެވި ވާހަކަފުޅުގައެވެ. ރައީސް ވިދާޅުވީ، އެމްޑީޕީގެ އެތެރޭގައި އަބަދުވެސް ޚިޔާލުތަފާތުވުންތައް އޮންނަ ކަމަށާއި، އެހެން ނަމަވެސް އެކަންތައްތައް ހައްލުވާނެ ކަމަށެވެ. އަދި އެމްޑީޕީއާ ވާދަކުރެވޭނެ ވަރުގެ އެހެން ޕާޓީއެއް ރާއްޖޭގައި ނޯންނާނެ ކަމަށާއި އެހެންކަމުން ޕާޓީއާއެކު ހުރިހާ ބޭފުޅުންވެސް ކުރިޔަށް ވަޑައިގަތުމަށް ރައީސް ޞާލިޙް ވަނީ އެދިވަޑައިގެންފައެވެ.

ޕާޓީގެ ތެރޭގައި މިހާރު ހުރި މައްސަލަތައް ޙައްލުކުރުމަށް މަސައްކަތް ކޮށްދެއްވާނެކަމުގެ ޔަގީންކަން އަރުވަމުން ރައީސް ވަނީ މަންޒަރު ކިލަނބުވާފަދަ ކަމެއް ނުކުރަށްވާނެ ކަމަށް ވިދާޅުވެފައެވެ.

ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙާއި އެމަނިކުފާނުގެ އަނބިކަނބަލުން ފަޒްނާ އަޙްމަދު މިލަދުންމަޑުލު އުތުރުބުރީގެ ބައެއް ރަށްރަށަށާއި މާޅޮސްމަޑުލު އުތުރުބުރީގެ ބައެއް ރަށްރަށަށް ކުރައްވާ ދަތުރުފުޅެއްގައި މިއަދު ހެނދުނު ވަނީ ފުރާވަޑައިގެންފައެވެ.

ރައީސުލްޖުމްހޫރިއްޔާގެ ދެކަނބަލުންގެ މި ދަތުރުފުޅުގައި، މިލަދުންމަޑުލު އުތުރުބުރީގެ 4 ރަށަކަށާއި، މާޅޮސްމަޑުލު އުތުރުބުރީގެ 4 ރަށަކަށް ޒިޔާރަތްކުރެއްވުމަށް ހަމަޖެހިފައިވެއެވެ.