އަންނަ އަހަރު 2 މިލިއަން ފަތުރުވެރިން ރާއްޖެއަށް ޒިޔާރަތްކުރާނެކަމަށް ލަފާކުރެއްވޭކަމަށް ޓުއަރިޒަމް މިނިސްޓަރ ޑރ. އަބްދުﷲ މައުސޫމް ވިދާޅުވެއްޖެއެވެ.

ޓުއަރިޒަމް މިނިސްޓަރ އަބްދުﷲ މައުސޫމް މިއަދު ވިދާޅުވީ އަންނަ އަހަރު ރާއްޖެއަށް ޒިޔާރަތްކުރާނީ 1.4 މިލިއަން ފަތުުރުވެރިންކަމަށް އެމްއެމްއޭއިން ވިދާޅުވާ ވިދާޅުވުމަށް އިޚްތިރާމްކުރައްވާކަމަށެވެ. ނަމަވެސް އަންދާޒާތަކުން ދައްކާގޮތުން އަންނަ އަހަރު ރާއްޖެއަށް ދެ މިލިއަން ފަތުރުވެރިން ޒިޔާރަތްކުރާނެކަމަށް ޓުއަރިޒަމް މިނިސްޓަރ ވިދާޅުވިއެވެ. އަނެއްކޮޅުން އަންނަ އަހަރަކީ ރާއްޖޭގެ ފަތުރުވެރިކަމަށް 50 އަހަރު ފުރޭ ރަން ޔޫބިލް އަހަރުކަންވެސް މިނިސްޓަރ މައުސޫމް ފާހަގަކުރެއްވިއެވެ.

Respect #MMA's optimistic forecast of 1.4 Million tourists arrivals to #Maldives in 2022. However, my forecast is atleast 2 Million tourists (13.5 million bed nights) in 2022. After all that's the #Maldives Tourism 50th Anniversary Golden Year. #MaldivesTourism50

— Abdulla Mausoom (@Mausoom_Maus) September 18, 2021

އެމްއެމްއޭގެ ދިރާސާއަކުން ދެއްކި ގޮތުގައި އަންނަ އަހަރު ރާއްޖޭގެ ފަތުރުވެރިކަން އެންމެ ރަނގަޅުވެގެންދާ ހާލަތުގައި ރާއްޖެއަށް ޒިޔާރަތްކުރާނެކަމަށް ބެލެވެނީ 1.4 މިލިއަން ފަތުރުވެރިންނެވެ. މިކަން ހާމަކޮށްފައިވަނީ ރާއްޖޭގެ ޓޫރިޒަމް ކުރިއަށް ލަފާކޮށް، އެމްއެމްއޭގެ ސީނިއާ ރިސާޗް އެނަލިސްޓް، ދަހާ ޝުއައިބު ހަދާފައިވާ ދިރާސާއެއްގައެވެ.

އެ ދިރާސާގައި ހަތަރު ހާލަތަކަށް ޓޫރިޒަމް ކުރިއަށް ލަފާ ކޮށްފައިވެއެވެ. އެއީ ވޯސްޓް ކޭސް (އެންމެ ގޯސް ހާލަތު) ގައާއި، މޮޑަރޭޓް ކޭސް (މެދުމިންވަރެއް)ގައާއި، އޮޕްޓިމިސްޓިކް (އެކަށީގެންވާ) ހާލަތުގައާއި، އަދި މޯސްޓް އޮޕްޓިމިސްޓިކް ކޭސް ނުވަތަ އެންމެ ރަނގަޅު ހާލަތުގައި ފަތުރުވެރިކަން އަންދާޒާކޮށް ޖަހާފައިވާ ހިސާބެކެވެ.

މި ރިޕޯޓުގައިވާގޮތުން ފަތުރުވެރިކަން އެންމެ ރަނގަޅު ހާލަތުގައި މިއަހަރު ނިމޭއިރު ރާއްޖެއަށް އަންނާނީ 1 މިލިއަން ފަތުރުވެރިންނެވެ. އަދި އަންނަ އަހަރު މި ހާލަތުގައި 1.4 މިލިއަން ފަތުރުވެރިން އަންނާނެ ކަމަށް ލަފާކޮށްފައިވާއިރު، 2023 ވަނަ އަހަރު ރާއްޖެއަށް އަންނާނެކަމަށް ލަފާކޮށްފައިވަނީ 1.8 މިލިއަން ފަތުރުވެރިންނެވެ. މި އަދަދު ވެގެންދާނީ ރެކޯޑް އަދަދަކަށެވެ.