ކޮވިޑް-19 ކޮންޓްރޯލް ކުރުމުގެ ގޮތުން ރާއްޖޭގައި ބޫސްޓަރ ޝޮޓް ދިނުމަށް މަޝްވަރާކުރަމުން އަންނަކަމަށް ހެލްތު ޕްރޮޓެކްޝަން އެޖެންސީގެ ޓެކްނިކަލް އެޑްވައިޒަރީ ގްރޫޕުގެ މެމްބަރު ޑރ. ނަޒްލާ މުޞްޠަފާ ވިދާޅުވެއްޖެއެވެ.

ޓީވީ ޕްރޮގްރާމެއްގައި ވާހަކަ ދައްކަވަމުން ޑރ. ނަޒްލާ ވިދާޅުވީ ރާއްޖޭގައި ބޫސްޓަރ ޑޯޒް ދިނުމަށް ހެލްތު ޕްރޮޓެކްޝަން އެޖެންސީގެ ޓެކްނިކަލް އެޑްވައިޒަރީ ގްރޫޕް، ޓެކުން ދަނީ މަޝްވަރާކުރަމުންކަމަށެވެ. އަދި ބޫސްޓަރ ޝޮޓް ދޭންފެށުމުގެ ކުރިން ދޭނެ ވެކްސިނަކާއި، އެ ވެކްސިންގެ ސްޓޮކް ހުރި މިންވަރުވެސް ބަލަން ޖެހޭނެކަމަށް ޑރ. ނަޒްލާ ވަނީ ފާހަގަކުރައްވާފައެވެ.

އެގޮތުން ދިރާސަތަކުން ދައްކާ ގޮތުގައި ބައެއް ޤައުމުތަކުގައި ވެކްސިންގެ ދެ ޑޯޒް ފުރިހަމަކުރުމަށްފަހު ބޫސްޓަރ ޝޮޓެއް ދެނީ ހަށިގަނޑުން އެންޓިބޮޑީ ލެވެލް ކުޑަކޮށް ދަށްވެފައިވާތީ ކަމަށާއި، އާންމުގޮތެއްގައި ބޫސްޓަރ ޑޯޒް ޖަހަން ރެކޮމެންޑް ކޮށްފައިވަނީ ހައިރިސްކް މީހުންނަށް ކަމަށް ޑރ. ނަޒްލާ ވިދާޅުވެފައިވެއެވެ. އެގޮތުން ބައްޔަށް ހުށަހެޅުމުގެ ރިސްކް ބޮޑު، ސިއްހީ ޚިދުމަތުގެ ދާއިރާގެ މުވައްޒަފުންނަށް ވެސް ބައެއް ޤައުމުތަކުގައި ބޫސްޓަރ ޝޮޓް ދޭކަމަށް ޑރ. ނަޒްލާ ފާހަގަކުރައްވާފައިވެއެވެ.

މީގެ އިތުރުން ރާއްޖޭގައިވެސް އެއްފަހަރަށް ވުރެ ގިނަ ފަހަރަށް ކޮވިޑް ޖެހިފައިވާ މީހުން އެބަތިބިކަން ފާހަގަކުރައްވަމުން ޑރ. ނަޒްލާ ވިދާޅުވީ، ފުރަތަމަ ކޮވިޑް ޖެހިގެން ރަނގަޅުވެފައި، އަނެއްކާވެސް ދެތިން މަސް ފަހުން ކޮވިޑް ޖެހިފައިވާ މީހުން އެބަތިބިމަށެވެ. ނަމަވެސް ރަނގަޅަށް ވެކްސިނޭޓެޑް އާބާދީއެއްގައި ކޮވިޑަށް ހުށަހެޅުނަސް އިންފެކްޓްވުމުގެ ފުރުސަތު ގާތަގަނޑަކަށް 60 އިންސައްތަ ދަށްވާކަމަށް ޑރ. ނަޒްލާ ވިދާޅުވިއެވެ.

ކޮވިޑްގެ ހަތަރުވަނަ ރާޅަށްފަހު ރާއްޖެއިން ކޮވިޑަށް ޕޮޒިޓިވްވާ މީހުންގެ އަދަދު މިހާރު ވަނީ ވަރަށް ބޮޑުތަން މަދުވެފައެވެ. އަދި މިހާތަނަށް ރާއްޖޭގެ އާބާދީގެ ބޮޑުބައެއް ވަނީ ވެކްސިން ފުރިހަމަކޮށްފައެވެ.