މިރެއިން ފެށިގެން ސްރީލަންކާއަށް ދަތުރުކުރާ ފަރާތްތަކަށް އެގައުމުގެ ސަރުކާރުން އިތުރު ލުއިތަކެއް ދޭން ނިންމައިފިއެވެ.

ސްރީލަންކާއަށް ދަތުރު ކުރާ ފަރާތްތަކަށް ކަނޑައެޅިފައިވާ އާލުއިތައް މިއަދު އިއުލާންކޮށްދެއްވަމުން ސްރީލަންކާގެ ހެލްތު މިނިސްޓަރ ވިދާޅުވީ މިއީ ކޮވިޑުން ރައްކާތެރިވުމަށް ވެކްސިން ފުރިހަމަ ކޮށްފައިވާ ފަރާތްތަކަށް ހާއްސަ ލުއިތަކެއް ކަމަށެވެ. މިގޮތުން ވެކްސިން ފުރިހަމަ ކޮށްފައިވާ ފަރާތްތަކުން ސްރީލަންކާ އަށް ދަތުރުކުރުމުގެ ކުރިން، 72 ގަޑިއިރު ތެރޭގައި ހަދާ ޕީސީއާރް ނެގަޓިވް ނަތީޖާއެއް ހުށައަޅައިފިނަމަ، ސްރީލަންކާއަށް އެތެރެވުމަށްފަހު އިތުރު ޕީސީއާރް ޓެސްޓެއް ހަދަން ނުޖެހޭނެކަމަށް ސްރީލަންކާގެ ސަރުކާރުން ވަނީ ނިންމާފައެވެ.

އަދި ވެކްސިން ނުޖަހާ އެގައުމަށް ޒިޔާރަތްކުރާ ފަތުރުވެރިންނާއި ސްރީލަންކާ ނޫން ގައުމުތަކުގެ ފަރާތްތަކުން، އެހެން މީހުންނާ މަސްހުނި ނުވާގޮތަށް ސްރީލަންކާއަށް އެތެރެވުމަށްފަހު އެމީހުންގެ މަންޒިލާ ހަމައަށް ވާސިލް ވެވޭނެކަމަށްވެއެވެ. ނަމަވެސް ކޮވިޑުން ރައްކާތެރިވުމަށް ވެކްސިން ފުރިހަމަ ކޮށްފައި ނުވާ ފަރާތްތަކުން ސްރީލަންކާއަށް އެތެރެވުމަށްފަހު އޮންއެރައިވަލް ޕީސީއާރް ޓެސްޓެއް ހަދަން މަޖުބޫރު ވާނެކަމަށް ސްރީލަންކާގެ ސިއްހީ އިދާރާއިން ހާމަކޮށްފައިވެއެވެ.

މިގަވާއިދުގައި ސްރީލަންކާއަށް ޒިޔާރަތްކުރާ ފަތުރުވެރިންނާއި ސްރީލަންކާ ނޫން ގައުމުތަކުގެ ފަރާތްތަކަށް ލުއިތަކެއް ދީފައިވިނަމަވެސް ސްރީލަންކާގެ ރައްޔިތުން ސްރީލަންކާއަށް ދަތުރު ކުރުމަށްފަހު، ވެކްސިން ފުރިހަމަ ކޮށްފައިވިޔަސް އަދި ވެކްސިން ފުރިހަމަ ކޮށްފައިނުވާ ފަރާތްތަކުންވެސް ޕީސީއާރް ޓެސްޓެއް ހަދަން މަޖުބޫރުވެއެވެ. ނަމަވެސް މިޓެސްޓު އެއަރޕޯޓުން ނުވަތަ އެމީހަކު ދާ މަންޒިލަކަށް ދިއުމަށްފަހުވެސް ހެދިދާނެއެވެ. އަދި އެއަށްފަހު 12 ދުވަސް ފަހުން ހަދާ ޕީސީއާރް ޓެސްޓުގެ ނަތީޖާ ނެގަޓިވްވެއްޖެނަމަ އާންމުންގެ ތެރެއަށް ނުކުމެ އުޅެވޭނެކަމަށް ވެއެވެ.