މެލޭޝިއާގައި ކޮވިޑުން ރައްކާތެރިވުމަަށް ޓީޗަރުން ވެކްސިން ނުޖަހާނަމަ ޖޫރިމަނާ ކުރުމަށް މެލޭޝިއާ ސަރުކާރުން ނިންމައިފިއެވެ.

މެލޭޝިއާ ސަރުކާރުން މިފަދަ ނިންމުމެއް ނިންމާފައިވަނީ އެގައުމުގެ ސްކޫލްތަކަށް ދަރިވަރުން ހާޒިރުވެ ކިޔަވައިދޭން ފެށުމަށް ނިންމުމާއެކުއެވެ. އޮކްޓޯބަރު 3 ވަނަ ދުވަހުން ފެށިގެން މެލޭޝިއާގެ ސްކޫލްތައް ހުޅުވަން ނިންމާފައިވާއިރު، ކޮންމެ ކްލާހެއްގެ ކެޕޭސިޓީ ވަނީ 50 އިންސައްތަ ދަށްކޮށްފައެވެ.

މެލޭޝިއާގެ ސްކޫލްތަކުގައި ކިޔަވައިދިނުން ފެށުމަށް ތައްޔާރުވަމުން ދިޔަ ނަމަވެސް 2000 ވަރަކަށް ޓީޗަރުން އަދިވެސް ކޮވިޑް ވެކްސިން ނުޖަހާކަމަށް މެލޭޝިއާގެ އެޑިއުކޭޝަން މިނިސްޓްރީން ހާމަކޮށްފައިވެއެވެ. މިއާއެކު ވެކްސިން ނުޖަހާ ޓީޗަރުންނާ ދެކޮޅަށް މެލޭޝިއާ ސަރުކާރުން އަޅާ ހަރުކަށި ފިޔަވަޅުތަކުގެ ތެރެއިން، ވެކްސިން ޖެހުމަށް ދެކޮޅު ހަދާ ޓީޗަރުން ޖޫރިމަނާ ކުރުމުގެ އިތުރުން، ވަޒީފާ ގެއްލުން އެކަށީގެންވާ ކަމަށްވެސް މެލޭޝިއާގެ އެޑިއުކޭޝަން މިނިސްޓަރ ހާމަކޮށްފައިވެއެވެ.

މީގެ އިތުރުން، މެލޭޝިއާގެ ސިވިލް ސާވަންޓުން، މިއަހަރުގެ ނޮވެމްބަރު މަހު 1 ވަނަ ދުވަހުގެ ކުރިން ކޮވިޑް ވެކްސިން ޖަހަން ޖެހޭނެކަމަށްވެސް މެލޭޝިއާ ސަރުކާރުން ވަނީ ހާމަކޮށްފައެވެ.