ގިނަ ދުވަސްތަކަކަށްފަހު އިންޑިއާގެ މުމްބާއީގައި ރެކޯޑު އަދަދަކަށް މީހުން ކޮވިޑް-19 އަށް ޕޮޒިޓިވް ވެއްޖެއެވެ.

އިންޑިއާގެ މީޑިއާތަކުން ރިޕޯޓް ކޮށްފައިވާގޮތުން، ފާއިތުވެދިޔަ 24 ގަޑިއިރުގެ ތެރޭގައި މުމްބާއީއިން 624 މީހުން ވަނީ ކޮވިޑަށް ޕޮޒިޓިވްވެފައެވެ. މިއީ ފާއިތުވެދިޔަ ޖުލައި މަހަށްފަހު މުމްބާއީގައި އެއް ދުވަސް މަތިން މިހާ ގިނަ މީހުން ކޮވިޑަށް ޕޮޒިޓިވް ވި ފުރަތަމަ ފަހަރެވެ. މީގެކުރިން އެއްދުވަހުގެ ތެރޭގައި އެންމެ ގިނަ މީހުން ބައްޔަށް ޕޮޒިޓިވްވި، މިއަހަރުގެ ޖުލައިމަހު 24 ގަޑިއިރުގެ ތެރޭގައި ކޮވިޑަށް ޕޮޒިޓިވްވެފައިވަނީ 635 މީހުންކަމަށްވެސް ރިޕޯޓްތަކުން ބުނެއެވެ.

ބުދަ ދުވަހު އިތުރު ހަތް މީހުން ކޮވިޑް ޖެހިގެން މަރުވެފައިވާއިރު، މުމްބާއީގައި ބަލި ޖެހިގެން މަރުވި މީހުންގެ ޖުމްލަ އަދަދު މިހާރުވަނީ 16،136 އަށް އަރާފައެވެ.

މުމްބާއިގައިވެސް ދުވާލަކު ކޮވިޑް-19އަށް ޕޮޒިޓިވްވާ މީހުންގެ އަދަދު މަޑުމަޑުން ދަށްވަމުން އައި ނަމަވެސް ފާއިތުވެ ދިޔަ 24 ގަޑިއިރަކީ ވޭތުވެދިޔަ ދެ މަސް ދުވަހަށް ފަހު އެހާ ގިނަ މީހުން އެއް ދުވަސް މަތިން ކޮވިޑަށް ޕޮޒިޓިވްވި ފުރަތަމަ ފަހަރެވެ. އަދި އިންޑިއާގެ މަހާރާޝްތުރާގައި ފާއިތުވެ ދިޔަ 24 ގަޑިއިރު ތެރޭގައި 2،876 ޕޮޒިޓިވް ކޭސް ވަނީ ރިޕޯޓްކޮށްފައެވެ. އަދި އެ ސްޓޭޓުން މުޅިއެކު 90 މީހުން ބަލީގައި މަރުވެފައިވާއިރު، އެ ސްޓޭޓުގައި ބަލި ޖެހިގެން މަރުވެއިވާ މީހުންގެ ޖުމްލަ އަދަދު ވަނީ 139،362 އަށް އަރާފައެވެ.