އުތުރުތިލަފަޅުގައި ކޯސްޓްގާޑް ޑޮކްޔާޑެއް ތަރައްގީކުރަން އިންޑިއާއާއެކު ވެފައިވާކަމަށް ބުނާ އެއްބަސްވުން ރައްޔިތުންގެ މަޖިލީހަށް ހިއްސާކުރަން އަންގަން ނިންމައިފިއެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި މިކަން އިއުލާން ކުރެއްވީ މަޖިލީހުގެ ރައީސް މުހައްމަދު ނަޝީދެވެ.

ރައީސް ނަޝީދު ވިދާޅުވީ އެ އެއްބަސްވުން ހިއްސާކޮށް މަޖިލީހުން ދިރާސާކުރަން ގޮވާލައި މަޑުއްވަރީ ދާއިރާގެ މެންބަރު އާދަމް ޝަރީފް ހުށަހެޅުއްވި މައްސަލަ ސަލާމަތީ ޚިދުމަތްތަކުގެ ކޮމިޓީން ދިރާސާކުރާނެ ކަމަށެވެ. އަދި މިއަދުގެ އެ އެއްބަސްވުން މަޖިލީހުގެ 241 ކޮމިޓީއާ ހިއްސާކުރުމަށް އެދި ޑިފެންސް މިނިސްޓްރީއަށް މަޖިލީހުގެ އަމީންއާންމު ސިޓީއެއް ފޮނުވާނެކަމަށް ރައީސް ނަޝީދު ވިދާޅުވިއެވެ.

އުތުރު ތިލަފަޅުގެ އެއްބަސްވުމުގެ އެއްވެސް ތަފްސީލެއް މިހާތަނަށް ހާމަކޮށްފައި ނުވާއިރު އެކަމާއި ގުޅިގެން ގިނަ ބަޔަކު ދަނީ ކަންބޮޑުވުން ފާޅުކުރަމުންނެވެ.

މީގެ ކުރިން އެއްބަސްވުމުގެ ބައިތައްކަމަށް ބުނާ ބައިތަކެއް ލީކުވެފައިވާއިރު، އެ އެއެއްބަސްވުން ބުނާ ގޮތުގައި އިންޑިއާ ސިފައިން އުތުރުތިލަފަޅުގައި ތިބޭނެއެވެ. އަދި އެހާހިސާބުން އުތުރު ތިލަފަޅުގެ އެއްވެސް ބާރެއް އެމްއެންޑީއަކަށް ވެސް ދިވެހި ސަރުކާރަށް ވެސް ނުހިނގާނެއެވެ. ލީކްކޮށްލާފައިވާ މި ލިއުމުގައި ބުނާ ވާހަކަތައް އެމްއެންޑީއެފާއި ސަރުކާރުން ވެސް ވަނީ ދޮގުކޮށްފައެވެ. ނަމަވެސް އެ އެއްބަސްވުން މިހާތަނަށް ވެސް އެއްވެސް ފަރާތަކާ ހިއްސާކޮށްފައެއް ނުވެއެވެ.