ގދ. ތިނަދޫގައި ކޮވިޑް-19އަށް ފަރުވާ ހޯދަމުން ދިޔަ 3 މަހުގެ ތުއްތު ކުއްޖަކު ނިޔާވެއްޖެއެެވެ.

ތިނަދޫ ޑރ. އަބްދުއްސަމަދު މެމޯރިއަލް ހޮސްޕިޓަލުން ބުނީ ނިޔާވެފައިވަނީ ތިނަދޫގައި ހުންނަ ކޮވިޑް ފެސިލިޓީގައި ފަރުވާދެމުން ދިޔަ ފިރިހެން ކުއްޖެއް ކަމަށެވެ.

ތިނަދޫ ތުއްތު ކުއްޖާގެ މަރާއެކު ރާއްޖޭގައި ކޮވިޑް-19 ބަލީގައި ނިޔާވި މީހުންގެ އަދަދު މިހާރު ވަނީ 239އަށް އަރައިފައެެވެ.

ފާއިތުވެދިޔަ 24 ގަޑިއިރުގެ ތެރޭގައި ނެގި 3،210 ސާމްޕަލްގެ ތެރެއިން 77 މީހަކު ކޮވިޑް-19އަށް ވަނީ ޕޮޒިޓިވް ވެފައެވެ. މުޅި ރާއްޖޭގައި މިވަގުތު ބަލި ޖެހިފައި ތިބީ 1،287 މީހުންނެެވެ.

ހުޅުމާލޭ މެޑިކަލް ފެސިލިޓީގައި ކޮވިޑް-19 އަށް ފަރުވާ ދެމުން ދިޔަ އުމުރުން ދުވަސްވީ މީހަކު ވެސް އިއްޔެ ވަނީ ނިޔާވެފައެވެ.

މި ބަލީގައި 12 މީހަކަށް ހޮސްޕިޓަލުތަކުގައި އެޑްމިޓްކޮށްގެން މިހާރުވެސް ފަރުވާދެމުން އަންނަ ކަމަށް ތަފާސް ހިސާބުތަކުން ދައްކައެވެ.