އދ. ދަނގެތީ މަޝްހޫރު ވިޔަފާރިވެރިޔާ މަހުމޫދު އަބޫބަކުރު އަނިޔާވެރިގޮތަކަށް ޤަތުލުކޮށް މަރާލިކަމަށް ތުހުމަތުކޮށް ރަށުން ބޭލި ތިން މީހުންވެސް ފުލުހުންގެ ބަންދުން ދޫކޮށްލައިފިއެވެ.

އުމުރުން 57 އަހަރުގެ މަހުމޫދު ފެނުނީ އޭނާ ގެއްލިގެން ރައްޔިތުން ނިކުމެ ހޯދަމުންދަނިކޮށް މަރާލުމަށް ފަހު ގޯންޏަކަށްލައި ވަޅެއްގެ ތެރެއަށް އެއްލާލާފައި އޮއްވައެވެ. މަހުމޫދު މަރާލައި އެއްލާލައިފައި އޮތްއިރު ބޭރު ފުށުންއަނިޔާތައް ދީފައި ހުރި ކަމުގެ ނިޝާންތަށް ހުރި ކަމަށް ޢާއިލާގެ ފަރާތުންވަނީ ބުނެފައެވެ. އޭނާގެ ކަރަށާއި ބޮލަށް އެއް ފަހަރަށް ވުރެ ގިނައިން ވަޅި ހަރާފައި ހުރި ކަމަށް ވެއެވެ.

މަޙްމޫދުގެ އަނިޔާވެރި ޤަތުލާ ގުޅިގެން ރަށުގެ ބަޔަކު ވަނީ ތުހުމަތު ކުރެވޭ ތިން މީހަކު ފުލުހުންނާ ހަވާލުކޮށްފައެވެ. އެއީ ދެ ފިރިހެނުންނާއި އަންހެނެކެވެ. އެތިންމީހުން ފުލުހުންގެ ޙިމާޔަތުގައި އެރަށުން ބާލާފައިވާއިރު އޭގެ ތެރޭގައި ހިމެނޭ ދެ ފިރިހެނުންނަކީ އއ.ތޮއްޑޫ ރައްޔިތުން ނިކުމެ އެރަށުންވެސް ބޭރުކޮށްފައިވާ ދެމީހުންނެވެ.

އެމީހުންގެ މައްޗަށް ފުލުހުން ކޮށްފައިވަނީ ޑްރަގް ޓްރެފިކިންގެ ތުހުމަތުކަމަށް މަޢުލޫމާތު ލިބިފައިވެއެވެ. އޭގެތެރެއިން ޖަމްޝާދާއި، ޝާރިހު މިމަހުގެ 23 ވަނަ ދުވަހު ވަނީ ދޫކޮށްލާފައެވެ. އަދި އެ މީހުންނާއެކު ހައްޔަރުކުރި އަންހެން މީހާ ދޫކޮށްލާފައިވަނީ މިމަހުގެ 21 ވަނަ ދުވަހުއެވެ.

މަޙްމޫދުގެ މަރުގެ މައްސަލާގައި ބަންގްލަދޭޝް އަށް ނިސްބަތްވާާ ސާލިމް ކިޔާ ބިދޭސީއަކު ހައްޔަރުކޮށް އޭނާގެ ބަންދުގެ މުއްދަތަށް ދަނގެތީގެ މެޖިސްޓްރޭޓް ކޯޓުން 15 ދުވަސް ވަނީ ޖަހާފައެވެ.

ދަނގެތީގައި ހޮޓަލެއް ހިންގުމުގެ އިތުރުން ކާޑުގެ ބާވަތްތައް ވިއްކައި އަދި އޮޑިދޯނިފަހަރު ވެސް ދުއްވާ މަޝްހޫރު ވިޔަފާރިވެރިޔާ މަހުމޫދުގެ މަރުގެ މައްސަލަ އާއި ގުޅިގެން ފުލުހުން ބުނީ އެމައްސަލަ ތަހުގީގު ކުރަމުންދާ ކަމަށެވެ.