މި ސަރުކާރުން ބުރިޖު އަޅަން މަސައްކަތް ނުކުރާކަމަށާއި، ބަޔަކު އުޅެނީ މިމަސައްކަތުގެ ތެރެއިން ބަދަލުގެ ގޮތުގައި ބޮޑު ލާރިގަނޑެއް ހޯދަންކަމަށް ހުޅުމާލެ ދާއިރާގެ ކައުންސިލަރ އަދި ޕީއެންސީގެ ނާއިބު ރައީސް އިބްރާހިމް ޝުޖާއު ވިދާޅުވެއްޖެއެވެ.

ޝުޖާއު މިހެން ވިދާޅުވެފައި މިވަނީ މިސަރުކާރުން މާލެއާއި ވިލިމާލެ އަދި ގުޅިފަޅާއި ތިލަފުށި ގުޅާލުމަށް އަޅާ ބިޔަ ބްރިޖުގެ އަމަލީ މަސައްކަތް ނުފެށި ލަސްވާކަމަށް ބުނެ ގިނަ ބަޔަކު ސަރުކާރަށް ފާޑު ކިޔަމުންދަނިކޮށް ބްރިޖުގެ ސާވޭ ކުރަން ފެށިކަމަށް އަނެއްކާވެސް ސަރުކާރުން ބުނުމާއި ގުޅިގެންނެވެ.

މިކަމާއި ގުޅޭގޮތުން ހުޅުމާލެ ދާއިރާގެ ކައުންސިލަރ އަދި ޕީއެންސީގެ ނާއިބު ރައީސް އިބްރާހިމް ޝުޖާއު ވިދާޅުވީ މި ސަރުކާރުން ބުރިޖު އަޅަން މަސައްކަތް ނުކުރާކަމަށާއި، ބަޔަކު އުޅެނީ މިމަސައްކަތުގެ ތެރެއިން ބަދަލުގެ ގޮތުގައި ބޮޑު ލާރިގަނޑެއް ހޯދަންކަމަށެވެ.

ބްރިޖު އެޅުމަށްޓަކައި ބައެއް ސާވޭތައް ފެށުނުކަމަށް ބުނާ ވާހަކަތަކަށް އިޝާރާތްކުރައްވައި ޝުޖާއު ވިދާޅުވީ މިސަރުކާރުގެ ވެެރިކަމުގެ ދައުރު ނިމޭއިރުވެސް އެ ސާރވޭ ނުނިމޭނެކަމަށެވެ. އަދި މިސަރުކާރުން އުޅެނީ ރައީސް ޔާމީން ބްރިޖެއް އެޅީތީ ބްރިޖެއް އަޅަންކަމަށްވެސް ޝުޖާއު ވިދާޅުވިއެވެ. ނަމަވެސް އެކަމުގެ ވިސްނުންތެރިކަމެއް މި ސަރުކާރުގައި ނެތްކަމަށް ޝުޖާއު ވިދާޅުވިއެވެ.

"‏ވެެރިކަމުގެ ދައުރު ނިމޭއިރުވެސް ތިޔަ ސާރވޭ ނުނިމޭނެ. ތިއުޅެނީ ބުރިޖު އަޅާކަށްނޫން. ބޮޑު ބަދަލެއް ރޭވުންތެރިކަމެއްގެ ތެރެއިން ހޯދަން. ރައީސް ޔާމީން ބުރިޖު އެޅިޔަތީ، ތިމާއަށް ވެސް ވާނޭކިޔާ އުޅޭތި، ބޮލުގަ ތެތްކަމެއް ނެތަސް." ޝުޖާއު ވިދާޅުވިއެވެ.

ގްރޭޓަރ މާލޭ ކަނެކްޓިވިޓީ ޕްރޮޖެކްޓު ކުރިއަށްގެންދިއުމަށް ހަމަޖެހިފައިވަނީ އިންޑިއާ ސަރުކާރުން ދޭ 100 މިލިއަން ޑޮލަރުގެ ހިލޭ އެހީއާއި 400 މިލިއަން ޑޮލަރުގެ ލައިން އޮފް ކްރެޑިޓްގެ ތެރެއިންނެވެ. މި މަޝްރޫޢު ނިންމުމަށް އަމާޒު ހިފާފައިވަނީ ދެ އަހަރު ދުވަހުގެ ތެރޭގައެވެ.

6.7 ކިލޯ މީޓަރު ދިގު މި ބްރިޖާއި ކޯސްވޭ ލިންކްގައި ދެރަށް ދޭތެރޭ ކަނޑުގައި އަޅާ މައި ބްރިޖްތަކުގައި 140 ކިލޯ މީޓަރު ހުންނާނެއެވެ. އަދި ފުން ފަޅުތަކުގައި 1.45 ކިލޯ މީޓަރަށް މެރިން ވިއަރޑަކްޓް، އަދި މޫދު ހިމެނޭގޮތަށް ގޮނޑުދޮށުގައި 2.32 ކިލޯ މީޓަރަށް މެރިން ވިއަރޑަކްޓް އަދި ބިމާ އެއްހަމައެއްގައި 2.96 ކިލޯ މީޓަރުގެ މަގު ހިމެނެއެވެ.

ނަމަވެސް މިކަމުގައި އަމަލީ އެއްވެސް މަސައްކަތެއް އަދި ފެށިފައެއް ނުވެއެވެ.