ނުފޫޒެއް ނެތް ކަމަށާއި ނަމަވެސް ދަޢުވާކުރެވޭނީ ހެކި ހުރެގެން ކަމަށް ޕްރޮސެކިއުޓަރ ޖެނެރަލް އަލްއުސްތާޛު ހުސައިން ޝަމީމް ވިދާޅުވެއްޖެއެވެ.

މިއަދު ބޭއްވި ނޫސްވެރިންގެ ބައްދަލުވުމުގައި ޕީޖީ ޝަމީމް ވިދާޅުވީ، މަސްތުވާ ތަކެތީގެ މައްސަލަތަކުގައި ވެސް އަދި ނޫން މައްސަލައެއްގައިވެސް އެ އޮފީހަށް އެއްވެސް ފަރާތަކުން ނުފޫޒު ފޯރުވަމުން ނުދާކަމަށެވެ. މިދިޔަ އޮކްޓޫބަރުމަހުގެ 13 ވަނަ ދުވަހު ފުލުހުން އަތުލައިގަތް 100 ކިލޯގެ މަސްތުވާތަކެތީގެ އެތެރެކުރުމުގައި އިސްކޮށް އުޅުނުކަމަށް ތުހުމަތު ކުރެވޭ 02 މީހުން ދޫކޮށްލައިފައިވާތީ ޝަމީމް ވިދާޅުވީ މައްސަލަތަކުގައި ނިންމުންތައް ނިންމަނީ ހުށައެޅޭ ހެއްކާއި ޤަރީނާއަށް ބެލުމަށްފަހު ކަމަށެވެ.

"100 ކިލޯ މައްސަލައިގައި ވެސް އަދި އެއްވެސް މައްސަލައެއްގައި ވެސް، އެއްވެސް މީހަކު ބަންދުގަ ބަހައްޓާކަށް ވެސް، ބަންދުން ދޫކޮށްލާކަށް ވެސް، މި އޮފީހަކަށް އެއްވެސް ނުފޫޒެއް ނެތް. ސަރުކާރުގެ ފަރާތަކުން ވެސް އަދި އެހެން ފަރާތަކުން ވެސް." ޝަމީމް ވިދާޅުވިއެވެ.

ޝަމީމް ވިދާޅުވީ ވަކި މީހަކީ ކުށްކުރާ މީހެއްކަން އޭނާ އަށް އެނގުނު ނަމަވެސް ކުރިމައްޗަށް ހުށަހެޅޭ ހެކިތަކަށް ބެލުމަށްފަހު ނޫނީ ދަޢުވާ ނުކުރެވޭނެ ކަމަށެވެ. 100 ކިލޯގެ މަސްތުވާތަކެތީގެ މައްސަލާގައި އިސްކޮށް ތިބި ދެ މީހުން ބަންދުން ދޫކޮށްލި މައްސަލަ ހައި ކޯޓުގައި އިސްތިއުނާފް ނުކުރަން ޕީޖީ އޮފީހުން ވަނީ ނިންމާފައެވެ.

ފަހަކަށް އައިސް ފުލުހުންގެ ބޮޑެތި އޮޕަރޭޝަން ތަކުގައި މަސްތުވާތަކެއްޗާއެކު ގިނަ ޢަދަދެއްގެ ބަޔަކު ހައްޔަރުކުރި ނަމަވެސް އޭގެ ތެރެއިން އިސްކޮށް ތިބޭކަމަށް ފުލުހުން ތުހުމަތުކުރާ މީހުން ކޯޓު މަރުޙަލާގައި ދަނީ މުޖުތަމަޢުގެ ތެރެއަށް ދޫވަމުންނެވެ.