ފުޅާދާއިރާއެއްގައި މަސްތުވާތަކެތީގެ ވިޔަފާރިކުރާކަމަށް ފުލުހުން ތުހުމަތުކުރާ އަރުޝަދު ޚާލިދުގެ ޑްރަގް ނެޓްވޯކުގައި ހިމެނޭ ހަމީހަކު ބަންދުން ދޫކޮށްލި މައްސަލަ އިސްތިއުނާފް ކުރުމަށް ޕީޖީ އޮފީހުން ނިންމައިފިއެވެ.

ޖެނުއަރީ މަހުގެ ފަހުކޮޅު ފުލުހުން ހިންގި އޮޕަރޭޝަނެއްގައި 10 ގެއަކާއި ވެހިކަލްތަކެއް ބަލައި، ފާސްކޮށް، ނުވަ ކިލޯގެ މަސްތުވާތަކެތި އަތުލައިގަނެ، ހައްޔަރުކުރި މީހުންގެ ތެރެއިން އަށް މީހެއްގެ މައްޗަށް ދައުވާކޮށްފައިވެއެވެ. ކްރިމިނަލް ކޯޓަށް ހުށަހެޅި މައްސަލައިގައި 4.6 މިލިއަން ރުފިޔާ ދައުލަތަށް ނަގައިދޭންވެސް ވަނީ އެދިފައެވެ.

ޕީޖީ އޮފީހުން ބުނީ ފެނުނު މަސްތުވާ ތަކެއްޗާ ގުޅުމެއް ނެތްކަމަށްބުނެ ކޯޓުން ދޫކޮށްލި 6 މީހުންގެ މައްސަލަ އިސްތިއުނާފް ކުރުމަށް މިހާރު ނިންމާފައިވާ ކަމަށެވެ. ކޯޓުން ދޫކޮށްލި މީހުންގެ ތެރޭގައި މި ނެޓްވޯކުގައި އިސްކޮށް ހުރި ކަމަށް ފުލުހުން ބުނާ އަރުޝަދުވެސް ހިމެނެއެވެ.

ފުލުހުންގެ އޮޕަރޭޝަނުގައި މަސްތުވާތަކެއްޗާއި އެ ތަކެތި ބަންދުކުރާ ސާމާނާއި، ފައިސާ ގުނާ މެޝިނު ފަދަ އެއްޗެހީގެ އިތުރުން ޑްރަގު ވިޔަފާރި ކޮށްގެން ހޯދާފައިވާ ކަމަށް ބުނާ 4.6 މިލިއަން ރުފިޔާ ހޯދި އެވެ. އެކަމަކު، އެ ތަކެއްޗާ، ދައުވާ ލިބޭ ހަ މީހަކާ ގުޅުވާނުލެވޭ ކަމަށް ނިންމައި، އެ ހަ މީހުން ދޫކޮށްލަން ސެޕްޓެމްބަރު 28 ވަނަ ދުވަހު ކްރިމިނަލް ކޯޓުން ވަނީ ހުކުމް ކޮށްފަ އެވެ.

އެ މައްސަލާގައި އަށް މީހެއްގެ މައްޗަށް ދައުލަތުން ދައުވާ ކުރިއިރު، މި މައްސަލައިގައި ކުށް ސާބިތުވީ ޒަހީނާއި އަސްލަމްގެ މައްޗަށެވެ. އެ ދެ މީހުން ވެސް އުމުރަށް ޖަލަށްލައި އެއް ލައްކަ ރުފިޔާއިން ޖޫރިމަނާ ކުރި އެވެ. އަދި ޒަހީންގެ ގޭގެ އެކި ތަންތަނުން ފެނުނު 19،500ރ. އާއި، 10،500ރ. އާއި 44،300ރ. އާ އެކު ޖުމްލަ 74،300ރ. ދައުލަތަށް ނަގަން ވެސް ހުކުމް ކުރި އެވެ.

މި މައްސަލައިގައި އަރުޝަދުގެ އިތުރުން ދައުލަތުން ދައުވާ ކޮށްފައިވަނީ އަހްމަދު ސުނައިނު، އަހްމަދު ގިޔާސް، އަލީ ޒުބައިރު، ހުސައިން ޒަހީން، އިސްމާއިލް ވިޝާލް، އަސްލަމް ނާޒިމް އަދި އަހްމަދު އިމްސާހުގެ މައްޗަށެވެ.