މިއަދު ފާހަގަކުރަމުންދާ މަސްވެރިންގެ ދުވަހުގެ މުނާސަބަތުގައި 4 ރަށެއްގައި ޤާއިމްކޮށްފައިވާ އައިސްޕްލާންޓް ހުޅުވުމަށް ނިންމައިފިއެވެ.

ފިޝަރީޒް މިނިސްްޓްރީން ބުނީ މި ހަތަރު އައިސްޕްލާންޓް ހުޅުވުމަށް ހަމަޖެހިފައިވަނީ ރ. މަޑުއްވަރި، ކ. ގާފަރު، ހއ. ހޯރަފުށީގެ އިތުރުން ޅ. ފެލިވަރުގައި ކަަމަށެވެ. އެގޮތުން ކ. ގާފަރާއި ރ. މަޑުއްވަރި އާއި ހޯރަފުށީގައި ހުޅުވުމަށް ހަމަޖެހިފައިވަނީ 25 ޓަނުގެ އައިސްޕްލާންޓެވެ. އަދި ފެލިވަރުގައި ހުޅުވަނީ 50 ޓަނުގެ އައިސްޕްލާންޓެކެވެ.

ރާއްޖޭގެ އަތޮޅުތަކުގައި 17 އައިސްޕްލާންޓު އޮޕަރޭޓްކުރަމުންދާއިރު، އެއީ ގާތްގަނޑަކަށް 730 ޓަނުގެ ކެޕޭސިޓީއެވެ. މަސްވެރިކަން ކުރިއެރުވުމަށް ސަރުކާރުން ކުރާ މަސައްކަތުގެ ދަށުން ރާއްޖޭގެ އެކި ހިސާބުތަކުން އައިސް ލިބޭނެ އިންތިޒާމް ހަމަޖައްސައިދިނުމުގެ މަސައްކަތް ދަނީ ކުރަމުންނެވެ. އަދި އެކި ހިސާބުތަކުން މަސް ކިރޭނެ އިންތިޒާމްވެސް ދަނީ ހަމަޖައްސަމުންނެވެ.

ރާއްޖޭގައި ފާހަގަކުރަމުންދާ 41 ވަނަ މަސްވެރިންގެ ދުވަސް ފާހަގަކުރުމަށް ބާއްވަވާ ރަސްމީ ޙަރަކާތްތައް މިއަދު ކ. ގާފަރުގައި ކުރިއަށް ގެންދާއިރު އެ ޙަރަކާތްތަކުގައި ރައީސް ޞާލިޙްވެސް ބައިވެރިވެ ވަޑައިގަންނަވާނެއެވެ. އެމަނިކުފާނު މިއަދު ވަނީ ބޮޑުކަންނެލި ދޯނިތަކަށް ޒިޔާރަތް ކުރަށްވައި އެފަރާތްތަކާވެސް ބައްދަލު ކުރަށްވާފައެވެ.

ކޮންމެ އަހަރެއްގެ ޑިސެންބަރު މަހުގެ 10 ވަނަ ދުވަހަކީ، ދިވެހިރާއްޖޭގެ މަސްވެރިންގެ ދުވަހުގެ ގޮތުގައި ފާހަގަކުރަމުން އަންނަ ދުވަހެވެ.