90 މިނެޓު ތެރޭ އޮމިކްރޯން ވޭރިއަންޓް ދެނެގަނެވޭނެ ޓެސްޓެއް، އިންޑިއާގެ ސައިންސްވެރިން އުފައްދައިފިއެވެ.

މިކަން އީޖާދުކޮށްފައި ވަނީ އިންޑިއަން އިންސްޓިޓިއުޓް އޮފް ޓެކްނޮލޮޖީ (އައިއައިޓީ) އިންނެވެ. މިގޮތުން އޮމިކްރޯން ވޭރިއަންޓް ދެނެގަތުމަށް ހަދާ މިޓެސްޓު ހަދާނީވެސް ޕީސީއާރް ޓެސްޓު ކުރުމަށް ސާމްޕަލް ނަގާ ފަދައިންނެވެ.

އޮމިކްރޯން ވޭރިއަންޓް އަވަހަށް ދެނެގަތުމަށް ހަދާ މިޓެސްޓުގެ ތަހުލީލުތަކުގެ ނަތީޖާ ރަނގަޅު ކަމަށް ފާހަގަކޮށް، މިޓެސްޓު ކިޓްތައް އިތުރަށް އުފައްދައި ބާޒާރަށް ނެރުމުގެ ވިސްނުމެއް ގެންގުޅޭކަމަށް އައިއައިޓީގެ ސައިންސްވެރިން ހާމަކޮށްފައިވެއެވެ. ހާއްސަގޮތެއްގައި އޮމިކްރޯން ވޭރިއަންޓަކީ ނުރައްކާތެރި ވޭރިއަންޓެއްގޮތުގައި ކަނޑައަޅާފައިވާ ވޭރިއަންޓަކަށް ވުމުން މި ވޭރިއަންޓު އަވަހަށް ދެނެގަތުމަކީ މުހިންމު ކަމެއްކަމަށް އައިއައިޓީގެ ސައިންސްވެރިންނާއި އެހެން ސިއްހީ މާހިރުންވެސް ފާހަގަކޮށްފައިވެއެވެ.

މިހާރު އޮމިކްރޯން ވޭރިއަންޓް ދެނެގަތުމަށް ހަދާޓެސްޓުގެ ނަތީޖާ ލިބުމަށް ތިން ދުވަސް ނަގައެވެ.

ކޮވިޑް-19ގެ އޮމިކްރޯން ވޭރިއަންޓަކީ ނޮވެމްބަރ 16 ވަނަ ދުވަހު ޑަބްލިޔުއެޗްއޯއިން "ވޭރިއަންޓް އޮފް ކޮންސަރން"ގެ ގޮތުގައި ކަނޑައަޅާފައިވާ ވޭރިއަންޓެކެވެ. މި ވޭރިއަންޓް ފެތުރޭ މިންވަރު ހަލުވިކަމަށް ވެސް ޑަބްލިޔުއެޗްއޯއިން ފާހަގަކޮށްފައިވެއެވެ. އަދި ގިނަ ބަޔަކަށް މިވޭރިއަންޓް ޖެހި ހޮސްޕިޓަލްތަކުގައި އެޑްމިޓްކުރަންޖެހޭ މީހުންގެ އަދަދު އިތުރުވެ، މި ވޭރިއަންޓް ޖެހިގެން މަރުވާ މީހުންގެ އަދަދުވެސް އިތުރުވެގެން ހިނގައިދާނެކަމަށް ޑަބްލިޔުއެޗްއޯއިން ބުނެއެވެ.