އެމެރިކާގެ ޖޯން ހޮޕްކިންސް ޔުނިވަރސިޓީގެ ތަފާސް ހިސާބުދައްކާގޮތުގައި އެގައުމުގައި ކޮވިޑް ބަލި ޖެހިގެން މަރުވި މީހުންގެ އަދަދު 800،000 މައްޗަށް އަރައިފިއެވެ.

އަދި މީގެތެރެއިން 200،000 މީހުން ކޮވިޑް ޖެހި މަރުވެފައިވަނީ ކޮވިޑުން ރައްކާތެރިވުމަށް ވެކްސިނެއް އުފައްދައި އެބޭނުން ކުރަމުންދަނިކޮށް ކަމަށް އެގައުމުގެ ސިއްހީ ވުޒާރާތަކުން ހާމަކޮށްފައިވެއެވެ. ނަމަވެސް މިއަދަދު މިއަށްވުރެއްވެސް އިތުރުވާނެ ކަމަށް އެމެރިކާގެ ސިއްހީ މާހިރުން ލަފާ ކުރެއެވެ.

އެމެރިކާގެ އާބާދީގެ 60 އިންސައްތަ މީހުން މިހާރު ވަނީ ކޮވިޑުން ރައްކާތެރިވުމަށް ވެކްސިން ޖަހާފައެވެ. އަދި ވެކްސިން ޖެހުމާ ދެކޮޅު ހަދާ ފަރާތްތައް ގިނަވުމާއެކު، އެގައުމުގައި ކޮވިޑް މަރު ގިނަވަނީ ވެކްސިން ނުޖަހާ މީހުން ގިނަވުމުން ކަމަށް އެމެރިކާގެ ސިއްހީ މާހިރުން ލަފާ ކުރެއެވެ.

ފަހުގެ ތަފާސް ހިސާބުން ދައްކާގޮތުގައި އެމެރިކާގައި 821،335 މީހުން ކޮވިޑްބަލީގައި މަރުވެފައިވެއެވެ. އެގޮތުން މިބަލީގައި އެންމެ ގިނަބަޔަކު މަރުވި ގައުމުތަކުގެ ލިސްޓުގެ އެންމެ ކުރީގައި އަދިވެސް ހިމެނެނީ އެމެރިކާއެވެ.