އުތުރު ކޮރެއާގައި ކުރިއަށް އޮތް 11 ދުވަހަށް ހުނުން މަނާކޮށް އެގައުމުގެ ސަރުކާރުން އެކަން އިއުލާންކޮށްފިއެވެ.

އުތުރު ކޮރެއާގައި ހުނުން މަނާ ކުރުމާއިއެކު ހަރުކަށި ގަވާއިދުތަކެއް އިއުލާންކޮށްފައިވަނީ އުތުރު ކޮރެއާގެ ކުރީގެ ރައީސް ކިމް ޖޮންގ އިލް އަވަހާރަވިތާ 10 އަހަރު ފުރުން ފާހަގަ ކުރުމުގެ ހިތާމައިގައި ބައިވެރިވުމަށެވެ. މިގޮތުން މިހިތާމައިގައި ބައިވެރިވުމަށްޓަކައި، ކުރިއަށް އޮތް 11 ދުވަހު އުތުރު ކޮރެއާގެ އެއްވެސް ރައްޔިތެއްގެ މޫނު މަތިން އުފާވެރިކަން އަދި ހިނިތުންވުމެއްވެސް ފެނިގެން ދިއުމަކީ މަނާކަމެކެވެ.

"ހިތާމައިގައި ބައިވެރިވުމަށް ކަނޑައަޅާފައިވާ ދުވަސްތަކުގައި ރާބުއިމާއި، ހުނުމާއި، އެކި ކުޅިވަރު ހަރަކާތްތަކުގައި އަހަރުމެން ބައިވެރިވުމަކީ މަނާކަމެއް." ރޭޑިއޯ ފްރީ އޭޝިއާއަށް ދިން އިންޓަރވިއުއެއްގައި އުތުރު ކޮރެއާގެ ރައްޔިތެއް ބުންޏެވެ.

ކިމް ޖޮންގ އިލް، އުތުރު ކޮރެއާގެ ވެރިކަން ކުރައްވާފައިވަނީ 1994 ވަނަ އަހަރުން ފެށިގެން ދުނިޔެ ދޫކުރަށްވަންދެނެވެ. 17 ވަރަކަށް އަހަރަށް ދިގުލައިގެން ދިޔަ މިވެރިކަން ނިމުމަކަށް އައުމާއެކު ދެން އުތުރު ކޮރެއާގެ ވެރިކަމާ ހަވާލުވެވަޑައިގަތީ ކިމް ޖޮންގ އިލް ގެ އެންމެ ހަގު ދަރިކަލުން އަދި މިހާރުވެސް ވެރިކަން ކުރައްވަމުން ގެންދަވާ ކިމް ޖޮންގ އުން އެވެ.

އުތުރު ކޮރެއާގެ ކުރީގެ ރައީސް ކިމް ޖޮންގ އިލް އަވަހާރަވިތާ 10 އަހަރު ދުވަސް ފާހަގަ ކުރުމުގެ ހިތާމައިގައި 11 ދުވަސް ފާހަގަކުރުމަށް ކަނޑައަޅާފައިވަނީ އުތުރު ކޮރެއާގެ މިހާރުގެ ރައީސެވެ.